NAVENDA NÛÇEYAN - TJA'yê li gelek bajaran çalakiyên 'Diyalogên Jiyana Azad' li dar xistin û parêznameyên Abdullah Ocalan xwendin. TJA’yê di çarçoveya kampanyaya “Ji Abdullah Ocalan re azadî, Ji pirsgirêka kurd re çareserî” helbest xwendin û sînevîzyonek hate pêşandan. Li Amedê jî, 3'yê Gulanê wekî "Roja Azadiya Rêbertiyê" îlan kirin.
Bi pêşengiya Tevgera Jinên Azad (TJA) li gelek bajaran di çarçoveya kampanyaya "Ji Abdullah Ocalan re azadî, ji pirsgirêka kurd re çareseriya demokratik" hevdîtin hatin lidarxistin.
AMED
Tevgera Jinên Azad (TJA) di çarçoveya kampanya "Ji Abdullah Ocalan re azadî, ji pirsgirêka kurd re çareserî" li avahiya Partiya Herêmên Demokratîk a Amedê (DBP) çalakiyek li dar xist. Di çalakiyê de helbest hatin xwendin û sînevîzyon hat nîşandan. Di çalakiya ku pankarta "Bi Rêbertî re Diyalogên Jiyana Azad" hat daliqandin, TJA, Dayikên Nobeda Edaletê, Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û gelek jin amade bûn.
Çalakî bi deqeyeke rêzgirtinê dest pê kir. Piştre aktîvîsta TJA'yê Arzu Karaman axivî. Arzû Karaman da zanîn ku wan 3'ê Gulanê weke "Roja Azadiya Rêbertiyê" îlan kirine û ji bo azadiya fîzîkî ya Rêberê Gelê Kurd Abdullah Ocalan wê li qadan xebatên xwe bimeşînin. Arzû Karaman bal kişand ser wê yekê ku jin her tim dibin hedefa hikûmetê û ev tişt anî ziman: "Hikûmet her tim hewl dide bi rêya jinên ku hedef digire civakek bêexlaq biafirîne. Dewlet polîtîkayên şerê taybet dimeşîne. Dewlet hewl dide xwe li ser civakek bêexlaq ava bike. Divê em li ser polîtîkaya şerê taybet bisekinin. Abdullah Ocalan diyar kir ku qetilkirina Narîn Guranê jî di heman demê de bûyereke ji ber nerêxistinbûyîna civakê ye. Divê em li dijî şer û pirsgirêkan bisekinin."
Arzû Karamanê anî ziman ku îro xwedî wateyeke dîrokî ye û got, "Em weke jin 3'ê Gulanê Roja Azadiya Rêbertiyê îlan dikin. Ji bo azadiya fîzîkî ya Rêbertî em ê li qadan bin, bi vê dirûşmeyê em ê li qadan bin. Azadiya Rêbertî azadiya jin û civakê ye. Cîhan Rêbertiyê nas dike, lê dewlet Rêbertiyê qebûl nake."
Piştî axaftina Arzu Karaman, Hevseroka Komeleya Alîkariya bi Malbatên Girtî û Hikûmxwaran re (TUAY-DER) Yeter Erel Tuma helbesta diyarîkirina rojê xwend.
Piştre sînevîzyonek hat pêşandan.
RIHA
Di çalakiya li avahiya Partiya Wekhevî û Demokrasiyê ya Gelan (DEM Partî) a navçeya Wêranşarê de endamên Meclîsa Dayikên Aştiyê ya Rihayê, Hevşaredara Wêranşarê Bedriye Yorgun, nûnerên Partiya Herêmên Demokratîk (DBP) û rêxistinên bajar û navçeyên bajêr ên DEM Partiyê amade bûn.
Çalakî bi deqeyek rêzgirtina ji bo kesên di têkoşîna azadî de jiyana xwe ji dest dane dest pê kir. Sînevîzyona "Azadiya Jinê" ku ji pirtûk, axaftin û parêznameyên Rêberê Gelê Kurd Abdullah Ocalan tê de hatibûn berhevkirin, hat nîşandan.
Hevseroka Komeleya Hiqûqnasên Azadîxwaz (OHD) a Şaxa Rihayê Gul Fehîme Bînîcî di panela ku hat lidarxistin de axivî û bal kişand ser mafê hêviyê û got, "Di mijara mafê hêviyê de biryara AÎHM'ê heye. Lê belê Tirkiyeyê di vê mijarê de tu amadekarî nekiriye. Ji Tirkiyeyê re ji bo gavavêtinê dem hatibû dayîn lê tu gav nehatin avêtin. Hemû serlêdanên me bi encam bûn û serlêdanên me yên nû hene.”
Çalakî bi klamên ku ji aliyê dengbej Leyla Adal ve hatin gotin bi dawî bû.
COLEMÊRG
Bi pêşengiya TJA'yê li avahiya DEM Partî ya Geverê bi heman armancê bername hat amadekirin û sînevîzyon hat temaşekirin. Meclîsa Dayikên Aştiyê, Rêxistinên DEM Partî yên navçeyan û aktîvîstên TJA'yê beşdarî bernameyê bûn.
STENBOL
Li Stenbolê, di çarçoveya "Xwendinên Azadiyê yên Kûrevî" de, beşên ji pirtûkên Rêber Apo hatin xwendin. Çalakî bi dirûşma “Israra di sosyalîzmê de israra ji bo mirovbûnê ye” li avahiya Navenda Çanda Mezopotamyayê (NÇM) ya Beyoglûyê pêk hat.
Bername bi deqeyek rêzgirtinê dest pê kir. Piştre aktîvista TJA'yê Mîzgîn Dûrûk axaftina vekirinê kir. Mizgîn Dûrûk diyar kir ku ji bo azadiya fizîkî ya Rêberê Gelê Kurd Abdullah Ocalançalakiyan li dar dixin û wiha axivî: "Roja xwendinê ji aliyê her kesî ve bi coş hat qebûlkirin û qebûlkirin. Ev pêngav di 3'yê Cotmehê de li Ewropayê hat destpêkirin. Ji bo azadiya fîzîkî ya Rêbertî çalakî û daxuyanî hatin dayîn û analîzên Rêbertî hatin xwendin. Dema ku krîza modernîteya kapîtalîst tunekirina civak, xweza û çareseriyên nû yên jinan kûrtir kir. Paradîgmaya demokratîk a birêz Ocalan a li ser jinê û paradîgmaya azadiyê ya ku ji bo civakê pêşkêş kir, ne tenê ji bo jinên Kurd, ji bo gelê Kurd û hemû gelên cîhanê bûye alternatîfeke mezin."
Çalakî bi nîqaşên jinan dewam kir.
ÎZMÎR
Li Îzmîrê jî bi pêşengiya TJA’yê li avahiya Partiya Wekhevî û Demokrasiyê ya Gelan (DEM Partî) çalakî hate lidarxistin. Di çalakiyê de sînevîzyona ku li ser têkoşîna azadiya jinan a paradîgmaya Abdullah Ocalan hatibû amadekirin hate pêşandan û helbestan hatin xwendin.