ENQERE - Parastvana mafên mirovan Fatma Bostan Unsal diyar kir ku divê îktîdar ji bilî gotinan gavan biavêje û got: “Em zêde demê winda nekin. Bila aştî bê Tirkiyeyê.”
Parêzvana mafên mirovan û akademîsyen Fatma Bostan Unsal, “Pêvajoya Aştî û Civaka Demokratîk” nirxand. Fatma Bostan Unsal, diyar kir ku ji ber şerên salan e li welat rû daye di qada mafê mirovan, hiqûq û ekonomiye de texrîbatên cidî çêbûne.
‘GAVÊN KU DIVÊ DESTHILAT BIAVÊJE’
Fatma Bostan Unsal, diyar kir ku ji bo aştiyeke mayînde divê desthilat gav biavêje û wiha axivî: “Di girtîgehan de girtiyên nexweş û pîr hene. Ji bo pêvajoya aştiyê gelek gav hene. Lêbelê em dikarin bibêjin ku ev gav nehatine avêtin. Me demeke dirêj winda kir êdî em demê winda nekin. Nexasim ji ber serneketina pêvajoya berê Tirkiyeyê gelek mercên xirab dît. Hem ji hiqûqe dûr ket û hem jî rewşa wê ya aboriyê kete qeyranê. Ev mercana ji ber nebûna aştiyê ye.”
‘FIRSEND DÎSA LI PÊŞBERÎ ME YE’
Fatma Bostan Unsalê, destnîşan kir ku firsenda sala 1993’yan ji bo pêvajoya pirsgirêka Kurd nehate nirxandin û wiha pê de çû: “Tirkiyeyê di sala 1993’yan de bi hêsanî dikaribû vê pirsgirêkê çareser bike. Demeke dirêj winda kir. Sedema destpêkirina pêvajoya heyî, geşedanên Rojhilata Navîn û Sûriyeyê ye. Ev yek ji bo Tirkiyeyê firsendeke zêrîn e. Emperyalîstên Lozanê sed sal berê bi xêzkirina sînoran ve xizm ji hevudin veqetand.”
‘DIVÊ GAV BÊN AVÊTIN’
Fatma Bostan Unsalê destnîşan kir ku tenê di gotinê de pêşveçûn heye û wiha axaftina xwe bi dawî kir: “Bêyî gotinên xwişk û biratiya Tirk û Kurdan divê sereraskirinên hiqûqî bên kirin. Divê pêşî li provokasyonên ku pêvajoya aştiyê xira dikin bên girtin. Ev 50 sal in gelên Tirkiyeyê zirareke mezin dît. Êdî bes e, bila ev dawî be û aştî bê Tirkiyeyê.”