WAN - Polîsên ku li navçeya Seravê bi ser malekê de girtin, Nevzat Hamzaoglûllari derb kirin û gefa kuştinê li hevjîna wî xwarin.
Duh di danê sibehê de polîsan li navçeya Seravê ya Wanê bi ser mala Gulçîn û Nevzat Hamzogûllari de girtin. Di serdegirtinê de polîsan Nevzat Hamzaogûllari li erdê dirêj kirin, bi pêyan derketin ser pişta wî û bi qontaxa tifingê li serê wî xistin. Hevjîna Hamzaogûllari, Gulçîn Hamzaogûllari jî li dijî polîsan derket. Polîsên ku çek xistin serê Gulçîn Hamzaogûllari, gefa kuştinê lê xwarin. Malbatê, der heqê polîsan de serlêdana sûc kirin.
TIŞTÊN HATINE KIRIN VEGOT
Nevzat Hamzaogûllari, da zanîn ku ji bo kurê wî biryara lêgerînê hebû lê der heqê wî de tu tiştek nîne û got: “Ji bo girtina kurê min li dikan û malên me yên li navenda Wanê lêgerîn kirine. Di lêgerînê de tiştek neqewimiye. Ez û hevjîna xwe li Seravê bûn. Serê sibehê saet di 06.00’ê de bi ser mala me de girtin. Ez derketim derve. Polîsên tîmên taybet ez dîtim. Ji min re gotin ‘bisekine.’ Ez jî sekinîm. Piştre 40 polîsan berê çekên xwe dan min. Ser min tenê cilên xewê hebûn. Derketim hewşa malê. Xwestin ez pêdevî xwe li erdê dirêj bikim. Min jî got ku çokên min diêşin û nikarim wisa bikim. Piştre li cem hevjîna min çêrên giran kirin. Destên min ji pişt ve girê dan û çêr û heqaretên xwe domandin. Ji wan yekî pêhnek li min da û bi qonataxa çekê li serê min xist. Serê min li betonê ket û hundirê pozê min teqiya. Ez jî qîriyam û min got; ‘Heke lêpirsîn an jî biryara girtina min hebe min bibin lê hûn nikarin vê îşkenceyê bikin.’ Ev zilm li min kirin û ji mirinê filîtim. Yek ji wan reha stûyê min bi tiliyên xwe şidand, heta demekî bêhna min çikiya û min got qey dê bimirim. Bi deqeyan derketin ser pişta min, derb kirin û her dera laşê min reş û şîn bû.”
‘BI SAETAN ÎŞKENCE KIRIN’
Di berdewamê de Hamzaogûllari da zanîn ku îşkence li hevjîna wî jî hatiye kirin û wiha dirêjî da axaftina xwe: “Hevjîna min ji bo ku bêhtir li min nexin, hewl da min biparêze lê nehiştin û asteng kirin. Polîsan, berê çekê dan serê hevjîna min û gefa kuştinê lê xwarin. Hevjîna min birin odeyê û îşkenceya li dijî min domandin. Min jê re got ku gelek nexweşiyên min kronîk ên weke şekir û tansiyonê hene lê guh nedan. Ji ber lêdanê xwîna min diherikî û ji ber ku nesekinî, birin nexweşxaneyê. Hevjîna min bi tena serê xwe ma û lêgerîn domandin. Bijîşkan ji bo sekinandina xwînê 5-6 saetan hewl dan û di dawiya dawî de sekinandin. Tansiyona min ket. Ji ber derbkirin û tansiyonê zirar gihiştiye gurçika min. Ji bo kurê min biryara lêgerînê derxistine, ji bo min tiştek nîne. Heke der heqê min de tiştek hebûya jî tu heqê wan nîne li min bixin. Em di pêvajoya aştiyê de ne. Tu kes van sepanan qebûl nake û nikarin bi kesekî bidin bawerkirin. Hûn ê bi birêz Ocalan re hevdîtinan bikin lê li hêla din dê îşkenceyê bikin. Ev wiha nabe. Ez giliyê wan dikim.”
‘BERÊ ÇEKÊ XISTIN SERÊ MIN’
Gulçîn Hamzaogûllari jî bûyer wiha vegot: “Wê rojê 10 wesayîtên polîsan hatin. Êrişî malê kirin û lêgerîn kirin. Dema li hevjînê min dixistin min mudaxile kir lê berê çekê xistin serê min û birin odeyê. Hemû cilên wî yên di nava xwînê de mabûn jî birin û tu delîl nehiştin. Tu sûcekî me tune bû û zilm li me kirin. Xwestin hinek kaxizan bi min bidin îmzekirin lê min jê re got ku xwendin û nivîsandina min nîne û ez ê îmze nekim. Piştre keyayek anîn û kaxiz dan mohrkirin. Keyayê gundê me nebû. Heke ez li malê nebûma, dê hevjînê min bikuştina.”
Malbatê, têkildarî îşkenceya hatiye kirin rapor wergirt û giliyê polîsan kir.
MA / Adnan Bîlen