NAVENDA NÛÇEYAN – TJA’yê li Amedê bi dirûşmeya “Ji bo civakeke azad û demokratîk em jin tên gel hev” kursiya aştiyê danî û daxwazên xwe yên li ser aştiyê anîn ziman.
1’ê Îlonê Roja Aştiyê ya Cîhanê wê li Amedê bi girseyî were pîrozkirin. TJA'yê ya Amedê têkildarî vê rojê dest bi xebatan kiriye. TJA’yê li ber Yek Derî ya navçeya Sûrê ya Amedê kom bûn û “Kursiya Aştiyê” danî. Parlamentera Amedê Adalet Kaya, parlamentera Mûşe Sumeyye Boz, aktivîstên TJAyê û gelek jin tev li hevdîtinê bûn. Jinan li derdorê bi alên TJAyê xemilandin û pankartên “Jin Jiyan Azadî, Bijî 1ê Îlonê”, “Niha dema kombûnê ye”, “Em ji bo avakirina soza aştiya jinan li ba hev in” û “Ji çanda kurdî re azadî” vekirin. Li vir ewilî jinan li ser Sûrê pankarta “Jin Jiyan Azadî” daliqandin û li ber erbaneyan govend gerandin.
Piştî govendê jin yek bi yek derketin li ser kursiyê û li ser aştiyê fikrên xwe anîn ziman.
Jinan diyar kirin ku ji bo jinên hatine qetilkirin soza me avakirina yekitiya jinan e û wiha axivîn: “Şerê Cîhanê yê 2’yemîn di 1ê Îlonê 1939an de dest pê kir û gelek kes hat kuştin. Ew bû roja aştiyê. Jin gelek êş kişandine. Divê aştî bi pêşentiya jinan bê avakirin. Tev li bûna jinan ya aştiyê divê ne sembolîk be. Jin pêşeng bin. Jinên kurd peyama aştiyê ji xwe re esas girtiye.”
Paşê Hulya Alokmen li ser navê TJAyê axivî. Hulya Alokmen diyar kir ku jin aştiyê dixwazin û wiha axivî: “Şer xirabiye û kuştin e. Pergala desthilatdar heta îro jin di malê de fetisandiye. Lê em jin dixwazin jiyanek nû biafirînin. Em ê li her derê dengê xwe bilind bikin. Têkoşîna azadiyê bidomînin.”
Li ser navê Dayikên aştiyê Afîfe Kartal axivî û hatina wan li vir anî ziman: “ Îro em ji bo aştiyê li vir in. Em naxwazin jin bên kuştin. Birêz Abdullah Ocalan rêya aştiyê vekir. Em ê pişt şopa xwe û xwîna zorkên xwe bin. Aştî xweş e, şer xirabî ye.”
Paşê Hevseroka OHDê şaxa Amedê Zeynep Karayilan axivî. Zeynep Karayilan diyar kir ku divê mafê hêviyê pêk were û wiha axivî: “Birêz Abdullah Ocalan ji bo aştiyê têdikoşe. Birêz Abdullah Ocalan û tevahî girtiyên siyasî bên berdan. Em ê aştiyê mezin bikin.”
Paşê Mîne Karataş derket ser kursiyê û wiha axivî: “Li meclîsa Tirkiyeyê dema ku dayikên aştiyê xwestin bi kurdî biaxivin hatin astengkirin. Em vê şermezar dikin. Hêj jî dijminatiya li ser zimanê kurdî didome. Duh jî karkerên kurd li Nîgdeyê rastî êrîşan hatin. Divê kurd bi zimanê xwe re azad bijîn. Divê her kes her derî bi kurdî biaxive.”
Dû re Parlamentera Amedê Adalet Kaya axivî. Adalet Kaya diyar kir ku ew îsal ji Roja Aştiyê gelek bi hevî ye û wiha axivî: “Em bi salan e têkoşîna aştiyê didin. Em ê bibin avakarên aştiyê. Piştî banga birêz Abdullah Ocalan pêvajo dest pê kir. Bi dehan sal me li ber xwe da û îro deriyê aştiyê vebû. Ji bo aştî mayînde bibe divê jin jî tev li pêvajoyê bibin. Jin azad nebin civak jî azad nabe.”
Altîvîsta TJAyê Ayla Akat Ata jî axivî û diyar kir ku bi salan e ew di nava têkoşîne de ne û wiha axivî: “Em hêza xwe ji Rêberê Gelê Kurd Abdullah Ocalan ê ku li girava Îmraliyî yê şev û roj li ber xwe dide distînin. Em hêza xwe dayikên aştiyê dibin. Em hêza xwe keda xwe keda jinan distînin. Jin li her qadê jiyanê ne. Tenê rêyekî heye ew jî rêya aştiyê ye. Em ê pêşî aştiya xwe ava bikin ew ê jî bandor bide tevahiya cîhanê. Jinên ku ji bo aştiyê dakevin qadan em ê her dem werin gel hev. Gavên ku bên avêtin em ê nîqaş bikin û pêşniyar bikin meclîse. Heta ku projeya Rêberê Gelê Kurd Abdullah Ocalan pêk were em ê di nav xebatan de bin.”
Jin bi yek yek derketin ser qursiyê û axaftin kirin û paşê zincîrê aştiyê pêk anîn û çalakî dawî bû.
WAN
Platforma Ked û Demokrasiyê ya Wanê belavok belav kirin û banga beşdarbûna meşa aştiyê li gel kır. Herwiha banga tevlibûna panela ku dê di 1’ê Îlonê, Roja Aştiyê ya Cîhanê de li Wanê were lidarxistin kir. Murat Atabay berî belavkirina belavokan li ser navê platformê axivî û got, "Wekî beşek ji banga ji bo civakek demokratîk û aştiyê, Platforma Ked û Demokrasiyê ya Wanê rêzeçalakiyan plan lidar dixe. Di çarçoveya vê înîsiyatîfê de, em ê sibê saet di 14:00’an de li Baroya Wanê panelek li dar bixin. Roja Duşemê saet di 20:00’an de, em ê ji Bazara Sebze heta Parka Aştiyê ya Musa Anter meşek aştiyê li dar bixin. Em ê belavokên ku me amade kirine li gel belav bikin û wan vexwînin meşa aştiyê û panelê."
Piştre, girse ji ber Şekerbankê dest bi meşê kir û belavok li gel belav kirin, banga beşdarbûna meşa aştiyê kirin.
STENBOL
Hevseroka bajarê Stenbolê ya Partiya Wekhevî û Demokrasiyê ya Gelan ( DEM Partî) Arîfe Çinar, Parlamentera Agiriyê ya DEM Partiyê Nejla Demîr û Meclîsa Jinan a DEM Partiyê li Şîşliyê belavok belav kirin derbarê Mîtînga Aştiyê ya 1’ê Îlonê ku dê di 31’ê Îlonê de li Stenbolê were lidarxistin kirin.
Jinan li taxan belavok belav kirin, mirov vexwendin mîtîngê.