Civînên Komîsyona Hevgirtina Neteweyî, Xwişk-Biratî û Demokrasiyê ya li Miclisê, didomin. Komîsyon, piştî Dayikên Aştiyê, Dayikên Şemiyê, parêzvanên heq û hiqûqnasan dê li akademisyen, karsaz û sendîkayan guhdar bike. 

Endamê Komîsyonê û Parlamenterê Partiya Demokrasî û Pêşveçûnê (DEVA) yê Mersînê Mehmet Emîn Ekmen, destnîşan kir ku guhdarîkirina malbat û dayikên di şer de bandor bûne girîng e û ev tişt got: “Guhdarîkirinên di komîsyonê de atmosefereke jidil ava dike fena her kes li qadên bajêr an li qehwexaneyên gund derdên xwe vebêje. Hinek kes piştgiriyê didin pêvajoyê, hinek kes pêvajoyê rexne dikin û hinek kes jî fikar xwe tînin ziman.”

 

CIVAKÎKIRINA PÊVAJOYÊ

 

Ekmen, diyar kir ku erka 51 endamên komîsyonê ew e ku li her kesê guhdar bike û çarçoveyeke hevpar biafirîne û wiha pê de çû: “Erka endaman ne ew e ku bibêje ‘ez vê qebûl nakim, te ev şaş got’. Di hemû axaftinan de tiştên ku li gorî me rast hene û tiştên şaş jî hene. Jixwe her kesê heman tişt bigota ewqas kesen cuda çênedibû. Divê em van axaftinên li komîsyonê wek xebateke civakîkirina pêvajoyê bibinin.”

 

‘PARVEKIRINÊN PARTIYAN PIR GIRÎNG E’

 

Ekmen destnîşan kir ku ew di pêşveçûna komîsyonê de ti pirsgirêk nabîne, komîsyonê nikaribe ku heta 31’ê Kanûna 2025’an pirsgirêkên sedsalî û tevlihev ên Tirkiyeyê bi awayekî bingehîn çareser bike û wiha dirêjî da axaftina xwe: “Bendewariyên wiha  yên berfireh ne rast in. Her çiqas şêwaza xebatê komîsyonê û nermbûna wê ya nîşandayî hêvîbexi bin jî, ne realîst e ku meriv li bendê be ku guhertinên bingehîn ên ji bilî Qanûna Vegera Malê û hinek sererastkirinên qanûnî çêbibin. Bendewariyeke wisa bê guman dê bibe sedema bêhêvîtiyê. Qanûna Vegera Malê heta berî Cotmehê nayê rojevê, lewra Parlamento di betlaneyê de ye. Ji ber vê yekê dê guhdarkirin heta serê meha Cotmehê bidomin. Ez van guhdarkirinan pir girîng dibinim. Guhdarîkirina Dayikên Aştiyê, Dayikên Şemiyê, MAZLUMDER û Komeleya Mafên Mirovan (ÎHD) pir girîng e. Lewra gelek aktorên siyasî cara ewil e bi van kes û saziyan re dicive.”

 

‘JI BO HER KESÎ DEMOKRASÎ Û EDALET’

 

Ekmen, rave kir ku divê biryarên Dadgeha Bilind, Dadegaha Destûra Bingehin û Dadgeha Mafê Mirovan a Ewropayê (DMME) bên cîbicîkirin, mijara girtiyên nexweş jî bi salan e tînin rojevê û wiha pê de çû: “Ev pirsgirêkek girîng e. Ev pirsgirêk hêj didome. Ev pêvajo ji bo her kesê demokrasî, edalet û hiqûqê bîne dê baweriya civakê bi pêvajoyê xurt bike.”

 

‘DIVÊ PIŞGIRÎ BÊN DAYÎN’

 

Ekmen, anî ziman ku divê komîsyon bi Abdullah Ocalan re hevdîtinê bike û wiha axaftina xwe bi dawî kir: “Ev mijar heta niha nehatiya rojeva komîsyonê. Serokê me ye giştî, got divê nêrînên xwediyê banga 27’ê Sibatê Ocalan ên têkildarî pêvajoyê bi awayeke erênî bê nirxandin. Lêbelê ev girêdayî mekanîzmaya ku li Îmraliyê hatiye avakirin û hem jî bi desthilatê ve girêdayî ye. Heta niha di komîsyonê de têkildarî vê yekê nîqaşeke wiha nehatiye kirin.” 

 

MA / Omer Gungor