Tevgera Jinên Azad (TJA), bi boneya 1’ê Îlonê Roja Aştiyê ya Cîhanê duh li navçeya Sûrê ya Amedê “Kursiya Aştiyê” danî. Jinên ku beşdarî çalakiyê bûn, daxwazên xwe yên ji bo aştiyê anîn ziman.

 

Rêvebira Komeleya Mafên Mirovan (ÎHD) Eylem Kaya, diyar kir ku jinên pêşengiya aştiyê bikin û jin ne tenê bi pergalê re têdikoşin di heman demê de bi hişmendiya mêr re jî têdikoşin û wiha axivî: “A rast şerê bi hişmendiya mêr dê bibe gava aştiyê. Lewre bi her aweyî pêwist e ku jin têbikoşin. Em dixwazin ku jin xwedî li vê pêvajoyê derbikeve. Lewre dema jin xurt dibin dê xebatên baş derkevin holê. Ji ber vê yekê em dixwazin ku hemû sazî û jin beşdarî vê pêvajoyê bibin û gotina xwe bibêjin.”

 

CHP: DÎVÊ TEMÎNATÊN HIQÛQÎ HEBE

 

Seroka Baskê Jinan a Partiya Komarê ya Gel (CHP) a Amedê Guler Koçyîgît wiha got: “Salên dûr û dirêj in aştî daxwaza her kesî ye. Em wek CHP piştigiriyê didin pêvajoyê. Lê polîtîkayên partiya me dibêje divê ev li ser esasê hiqûqî bê çareserkirin. Civak bi hêvî ne lê ji berk u naverok nayê parvekirin bibaweriyê çêdike. Pêvajoyê ber bi ku ve biçe, dê çawa bi dawî be û desthilatê çiqas ji dil be ê bi hev re bibinin. Divê pêvajo şefaf be û bi temînatên hiqûqî ve bawerî bê xurtkirin.”

 

‘DÊ JIN TEVKARIYA XURT PÊŞKÊŞ BIKIN’

 

Berdevka Jinan a Partiya Wekhevî û Demokrasiyê ya Gelan (DEM Partî) a Amedê Gulîz Kaya, diyar kir ku axaftina li ser çareseriya demokratîk moral dide her kesê û ev tişt got: “Geşedanên ku gel beşdarî pêvajoyê bike an baweriyê bide gel çênabin. Em dizanin ku rêzdar Abdullah Ocalan pêşengê pêvajoyê ye. Bi keda wî pêvajo hate vê qonaxê. A ku dikeve ser milê me divê em vê pêvajoyê xurt bikin û aştî û civaka demokratîk bi rêxistin bikin.”

 

‘DIVÊ EM LI ZIMANÊ XWE YÊ DAYIKÊ XWEDÎ DERKEVIN’

 

Sorgul Aytek Avşar, anî ziman ku divê gel, ciwan, jin piştgiriyê bidin vê pêvajoyê û daxwaza ewil a jinan ew e ku jiyana azad a bi zimanê xwe û çanda xwe yê û got, “Di vê pêvajoyê de berî her tiştî divê em xwedî li zimanê xwe derkevin.”

 

‘JI BO AŞTIYÊ EM DENGÊ XWE BILIND BIKIN’

 

Endama Komeleya Piştevaniya bi Malbatên Girtiyan re (TUAY-DER) Saîme Çîçek wiha axivî: “Ji bo Tirk û Kurdan pêvajoyeke girîng e. Divê her du gel jî vê pêvajoyê baş binirxînin. Nexasim jin divê bêtir xwedî li pêvajoyê derkevin. Bila 1’ê Îlonê Roja Aştiya Cîhanê, bibe wesîleya aştiyê. Heta jin dengê xwe bilind nekin, rêxistin nebin dê qetlîamên jinan jî zêde bibin. Ji ber vê yekê divê dengê jinan bilind be û dengê jinan bê bihîstin.”

 

MA / Rukiye Payîz Adiguzel - Mujdat Can