Wekîlê Partiya Gelecekê yê Îzmîrê Mûstafa Bîlîcî ku di Komîsyona Hevgirtina Neteweyî, Xwişk-Biratî û Demokrasiyê de cih digire, têkildarî xebatên komîsyonê axivî. Bîlîcî, got ku tiştekî girîng e ku komîsyon li derdorên cuda guhdarî dike û ev tişt anî ziman: “Peywira komîsyonê ew e ku êşan hîs bike û tiştên hatine jiyîn ji xwediyên wan bi xwe guhdarî bike. Armanc ne pêşbirka êşa ye. Armanc ew e ku ji bo ev êş êdî neyên kişandin rêyên çareseriyê nîqaş bikin.” 

 

Bi domdarî Bîlîcî, diyar kir ku armanca wan a esasî ew e ku êdî tu zarokên vî welatî neyên kuştin û wiha pê de çû: “Bila êdî dayik û bav negirîn. Bila welatekî keyfxweş, bihizûr, hiqûq lê serwer û demokrasiya ku hemwelatiya wekhev diparêze lê ava be. Meclis niha li betlaneyê ye û em dixwazin heta 15’ê Îlonê li hemû derdoran guhdarî bikin.” 

 

'DIVÊ GAVÊN DEMOKRATÎKBÛNÊ BÊN AVÊTIN’ 

 

Di berdewamê de Bîlîcî bi lêv kir ku di xebatên komîsyonê de hinek pêşdaxwazên îktîdarê hene û got: “Tesfiyekirina rêxistinê, berdana çekan, rewşa kesên dê ji çiyê vegerin, hiqûqa cezayê ya ku dê pê rû bi rû bimînin û hwd. Dixwazin xebatên di van mijaran de temam bikin. Bêguman em jî vê dixwazin lê em dixwazin piştî wan tavilê gavên demokratîkbûnê bên avêtin. Ji ber ku bi tenê sererastkirina înfazê ya têkildarî hatinên ji çiyê re ev meseleye dê çareser nebe. Divê têkildarî demokratîkbûnê teqez gav bên avêtin.” 

 

GAVÊN EWIL ÊN DIVÊ BÊN AVÊTIN 

 

Bîlîcî, daxuyand ku rast nîne berpirsyartiya çareserkirina pirsgirêka Kurd a ku sedsale didome li komîsyonê were barkirin û ev tişt anî ziman: “Ji ewil divê gavên demokratîk bên avêtin. Weke mînak; sepana qeyûm heye. Em li dijî vê ne û divê teqez were rakirin. Divê biryarên DMME û AYM’ê bên cîbicîkirin. Heke hûn aliyekî peymanekê bin, divê hûn berpirsyartiyên wê bicih bînin. Weke dewlet divê hûn li gorî van biryaran tevbigerin.”

 

‘DIVÊ HÛN BI MUXATABÊ WÊ RE HEVDÎTINÊ BIKIN’ 

 

Bîlîcî, têkildarî bangên ji bo komîsyon bi Rêberê Gelê Kurd Abdullah Ocalan re hevdîtinê bike jî ji ewil têgeha “lîderê damezirîner ê rêxistinê” ku Devlet Bahçelî ji bo Adullah Ocalan bi kar anîbû bi bîr xist û got: “Lîderê damezirîner ê PKK’ê Abdullah Ocalan e lewma bidawîkirina fealiyetên PKK’ê bi banga wî bû. Yê ku ev pêk anî Abdullah Ocalan e. Heta niha jî endamên komîsyonê ev mijar qet ne anîne rojevê û nîqaş li ser nehatiye kirin. Lê dewlet û saziyên wê duh jî hevdîtin dikirin, îro jî dikin û dê sibe jî bikin. Ev tiştekî xwezayî ye. Heke hûn pêvajoyekê birêve bibin, divê hûn bi muxatabê wê re hevdîtinê bikin.” 

 

‘ÎRADEYEKE SALEM RABER KIR’

 

Bîlîcî, anî ziman ku divê mafên hemû derdorên Tirkiyeyê bên dayin û axaftina xwe wiha qedand: “Ev yek zirarê nade tu kesekî. Bawer bikin ku dewlet parçe nabe, dabeş nabe. Bes ku hesta aîdiyetê em ava bikni. Hesta ‘Ev welatê min e. Ez hemwelatiyekî/a wekhev im’ dê aştiyê jî bêhtir pêş bixe. Divê em li gotinên xwe hişyar bin. Bi gotinên xelet ên siyasetmedaran gel carnan li dijî hev sor dibe. Lewma divê bi berpirsyarî tevbigerin. Ez gelek keyfxweş im. Pêvajoya 2013-2015’an jî tê bîra min lê vê carê îradeyeke saxlem hatiye raberkirin. Ez wisa dibînim. Îşala dawiya wê bi xêr be.” 

 

MA / Omer Gungor