Di 7’ê Tîrmehê de, li Girtîgeha Hejmara 2 a Xarpêtê di dema lêgerînê de, dîmenên îşkenceya gardiyanan a li ser girtî Omer Cûma Salih ê ku ji bajarê Minbicê yê Bakur û Rojhilatê Sûriyeyê ye, derketin holê. Di dîmenên 14 deqîqe de ku xuya ye di dema lêgerîna li qawişê de bi îdiaya nîşe heye hatine kişandin, gefên sergardiyan ên wekî "Dema min ew (nîşe) dît, hûn nikarin vir mehekê kom bikin" tên bihîstin. Di dîmenan de tê dîtin ku ligel gefan, gardiyanên tevî sergardiyan beşdarî lêgerînê bûne qawişê belav dikin, kelûpelan belav dikin û wan diavêjin, zirarê didin nivînan, maseya qawişê dişikînin û dermanan belav dikin. Tevî ku girtî dibêjin "nîşe nîn e", tê bihîstin ku gardiyan bi israr pirsa nîşeya ku li gorî îdiaya wan "nû hatiye" dikin.

 

LI SER RÛYÊ WÎ WERIMÎN Û REŞAYÎ

 

Ji bo ku kêliya îşkenceyê nekeve ber kamerayê, gardiyan Salih derdixin qata jor a qawişê. Di dîmenan de dengê lêdana sergardiyan tê bihîstin û Salih bi qêrîn dibêje "lê nexe". Ji bo ku dengê îşkence û qêrînê nekeve dîmenan, tê fêmkirin ku sergardiyan ji bo bêdengkirina Salih dibêje "Şişşt". Herwiha tê dîtin ku gardiyanê ku dîmenan dikşîne jî hewl dide kamerayê ji girtiyan dûr bixe. Di destpêka dîmenan de li rûyê Salih tu şopên lêdanê nîn in, lê di dawiya dîmenan de li ser rûyê wî de reşayî û werimîn tên dîtin. Dema ji qawişê derdikevin, sergardiyan li singê Salih dixe û personelê kamerayê jî di wê kêliyê de berê kamerayê ber bi aliyekî din ve dizivirîne.

 

JI PISPORAN YEQÎNIYA KIRYARÊN XERAB

 

Di rapora pisporê ku Serdozgeriya Komarê ya Xarpêtê têkildarî bûyerê xwestibû de, hat diyarkirin ku Salih rastî kiryarên xerab hatiye. Di rapora ku 28’ê Tîrmehê de hat amadekirin de hat gotin: "Di dema lêgerînê de gardiyanekî bi qêrîn gotiye 'derewan neke'; sergardiyan jî gotiye 'wê nîşeyê bidin, nexwe hûn nikarin vir di mehekê de kom bikin' (...)"

 

Di raporê de hat destnîşankirin ku di saniyeya 05.38’an a dîmenê de dema kamera li qata jor dikişîne, Omer Cûma Salih li qata jêr e û gotineke wekî "lê nexe" ku baş nayê fêmkirin. Di raporê de hat tomarkirin ku di saniyeya 09.30’an de dema kamera li qata jêr dikişîne, Omer Cûma Salih ê li qata jor e wisa diqîre ku diyar e azarê dibîne. Hat diyarkirin ku axaftinên wî yên paşê zelal dernakevin û wisa xuya dike ku devê wî hatiye girtin. Di vê kêliyê de sergardiyan dibêje "Şişt" û hin gardiyanên li qata jêr ber bi jor ve dinêrin. Di raporê wiha hatiye tomarkirin: "Di vê kêliyê de kamera qatên jêr dikişîne; tiştên li qata jor diqewimin xuya nakin, lê ji dangan wisa tê fêmkirin ku Omer Cûma Salih rastî kiryarên xerab hatiye."

 

ÎFADEYA SALIH

 

Salih, di 16’ê Kanûnê de di îfadeya xwe ya dayî Serdozgeriya Komarê ya Xarpêtê de diyar kir ku roja bûyerê tevî 3 girtiyên din derketine hewşê û di wê kêliyê de ji cihekî ku ew nizane ji kîjan alî ye gogek hatiye. Salih anî ziman ku gardiyan hatine cem wan û îdia kirine ku bi wê gogê peyam hatiye şandin û ji wan xwestine ku wê peyamê bidin wan. Salih di îfadeyê de ev tişt got: "Min jî got ku ez nizanim ev gog çawa hat, di hundirê wê de tu peyam nîn e, gog li erdê ye û bila lêkolîn bikin. Piştre 15 gardiyan hatin qawişê û her der serobin kirin."

 

'JI BER ŞIDANDINA ÇENGEYA MIN JI DEVÊ MIN XWÎN HAT'

 

Salih di îfadeya xwe de diyar kir ku sergardiyan ew biriye qata jor a qawişê û bi sergardiyan re 6-7 gardiyanên din jî derketine jor. Salih got ku sergardiyan bi darê çekpasê li lingê wî xistiye, 2-3 sîle li rûyê wî dane û çengeya wî şidandine. Salih anî ziman ku ji ber şidandina çengeyê, ji devê wî xwîn hatiye. Salih destnîşan kir ku bêyî sergardiyan kesî lê nexistiye, lê di dema lêdanê de gardiyanên din ew girtine û wiha got: "Piştre sergardiyan daket jêr û gef li me xwar û got 'Heke hûn ji kesê re qala vê bûyerê bikin û hevalên we yên din bibîzin, em ê dîsa werin'."

 

Salih di îfadeya xwe de diyar kir ku ew ji sergardiyanê ku îşkence lê kiriye gilîdar e.

 

MA / Rûkiye Payîz Adiguzel