Komeleya Lêkolînên Ziman û Çandên Mezopotamyayê (MED-DER), PENa Kurd, Komeleya Wêjevanên Kurd, Federasyona Komelêyên Hiqûq û Piştevaniyê ya Malbatên Girtiyan a Medê (MED TUHAD-FED), Komeleya Jinan a Rosayê, Komeleya Hiqûqnasên Ji Bo Azadiyê (OHD) û Navenda Mafên Jinan a Baroya Amedê ji bo çîrokên girtiyên jin bikin pirtûk, xebatek dabûn destpêkirin. Xebata van rêxistinên civaka sivîl didome. Ji 22'yê Kanûna 2021'ê heya niha 7 çîrok hatine berhevkirin.

 

Hevseroka MED-DER'ê Şîlan Elmas Kan û rêvebira MED TUHAD-FED'ê Sûnay Aslan behsa xebatên bi rê ve dibin kirin. 

 

ARMANCA PROJEYÊ

 

Hevseroka MED-DER'ê Şîlan Elmas Kan bal kişand ser êrişên li ser ziman û çanda kurdî û têkoşîna li girtîgehan û got: "Me xwest ew têkoşîna li nava çar dîwaran bê zanîn û di bîra gelê kurd de cihekî çêbikin. Li ser zimanê kurdî êriş hene. Jin, di girtîgehan de bi kurdî diaxivin û ji ber vê cezayê dîsîplînê li wan tê birîn. Me jî xwest hafizeyek wê manewiyat û berxwedanê çêbibe. Bi salan e gelek jin girtî ne. Hin jin hene 30 sal in girtî ne, cezayê muebedê girtine. Me xwest em çîroka wan nas bikin." 

 

'ÇÎROKÊN XWE BIŞÎNIN'

 

Kan, xwest jinên girtî û malbatên wan xwe bigihînin wan û wiha got: "Bila çîrokên xwe yên kurdî tevî kurtejiyana xwe ji me re bişînin. Em ê van çîrokan piştî nirxandina komîsyonê biweşînin. Dikarin çîrokên xwe ji MED TUHAD-FED'ê re bişînin. Em dixwazin bersiva tecrîda li ser kurdî, nirxên kurdî û girtiyan bidin." 

 

7 ÇÎROK

 

Ji rêveberên MED TUHAD-FED'ê Sûnay Aslan jî diyar kir ku hê jî gelek kes ji ber sedemên polîtîk girtî ne û got: "Em jî hewl didin ku vê polîtîkayê bişikînin. Lewma em di demên cuda de kampanyayên cuda li dar dixin û hewl didin vê qirkirinê bişikînin." Aslan, destnîşan kir ku ev proje jî parçeyeke vê xebatê ye û wiha domand: "Me xwest em çîrok û xebroşkên xwe ji nifşên nû re bihêlin. Ev proje bi fikireke wisa derket holê. Ji bo hevrêyên jin xw ebaş îfade bikin û li girtîgehê ji xwe re qadekê çêbikin me xebateke wiha da destpêkirin." 

 

Aslan, anî ziman ku xwestine çîrokan heya 8'ê Adarê berhev bikin û wekî pirtûk biweşînin, lê ji ber astengiyên li girtîgehan li hev derneketiye û got: "Nameyên hatine hene, lê ne pir in. Em dizanin jinên girtî nameyan dişînin, lê ev bi awayekî bi derengî bi dest me dikevin." 

 

Aslan, da zanîn ku heya niha 7 çîrok gihaştine ber destên wan. 

 

XEBAT DIDOME

 

Aslan di dawiyê de wiha axivî: "Jinên girtî bi rêya malbatên xwe dikarin nameyan bişînin. Li 7 herêman jî saziyên me hene. Dikarin nameyên xwe bişînin TUAY-DER an jî MED TUHAD-FED'ê."