Seroka Yekîtî Niştimanî Kurdistan (YNK) Bafil Celal Talabanî bi wesîleya destpêkirina kampanya hilbijartinê ya Parlamentoya Herêma Kurdistanê peyamek bidîmen weşand. 

 

Serokê YNK'ê bêyî ku nav bide bal kişand ser PDK'ê û ragihand ku Herêma Kurdistanê ev demeke dirêj e ji aliyê yek partiyê ve tê birêvebirin û vê partiyê jî Herêma Kurdistanê firotiye dijminên gelê kurd. Serokê YNK’ê di peyama xwe de wiha got: “Divê welatiyên me aramiyê hîs bikin, ne weke niha diron li ser asîman bifirin û rojane welatî bikujin û kes jî hemberî vê dengê xwe dernexe.”

 

Talabanî di berdewamiya peyama xwe de got ku hizba desthilata li Herêma Kurdistanê, rê nade Bexda mûçeyê karmendan bişîne û ev jî leyîstina bi welatiyan e.”

 

Talabanî da zanîn ku dema borî de Herêma Kurdistan li ser asta navneteweyî xwedî rêzdariyek mezin bû, ji ber ku azadî hebû, lê niha nivîskar û rojnamevan li ser nivîs û gotarên xwe tên girtin û bi terorê tên tewanbarkirin. Di dawiyê de jî Bafil Talabanî got ku li gel wan ti cûdahiya navçeyên Herêma Kurdistanê nîne û eger welatî bawerî bidin, ew ê rê nedin tu cudahiyan.