ÎZMÎR - Di îdianameyên ku der barê her 3 rojnamevanên ku li Îzmîrê hatibûn binçavkirin hatin amadekirin de, xebatên rojnamevaniyê sûc hatine hesibandin. Ji bo nûçeyên ekolojiyê yên rojnamevan Tolga Guney hatiye gotin ku li gor daxuyaniyên "Komîsyona Ekolojiyê ya KCK'ê" hatine çêkirin.
Di çarçoveya lêpirsîna ku ji aliyê Serdozgeriya Komarê ya Îzmîrê ve bi îdiaya "endamtiya rêxistinê" hat kirin de nûçegihana Jinnewsê Melîke Aydin, nûçegihanên Ajansa Mezopotamyayê (MA) Semra Tûran, Tolga Guney, Delal Akyuz, nûçegihanê Gazete Dûvarê Cîhan Başakçioglu û xebatkarê çapemeniyê yê Partiya Wekhevî û Demokrasiya Gelan (DEM Partî) Fûnda Akbûlût di 13'ê Sibatê de bi serdegirtina malan de hatibûn binçavkirin. Der barê rojnamegerên ku di 16'ê Sibatê de sewqî Dadgeha Cezayê Sulhê hatin kirin Aydin, Guney, Akyuz û Akbûlût de biryara cezayê hepsa malê û der barê Başakçioglû û Tûranê de jî biryara hefteyê 2 caran îmzedayîn hat dayîn. Piştî lêpirsîna 8 mehan der barê Cîhan Başakçîoglû de biryara neşopandinê hat dayîn. Îdianameya der barê Fûnda Akbûlûtê de hat amadekirin û ji Dadgeha Cezayê Giran a 18'an a Îzmîrê re hat şandin. Dadgehê îdianameya AKbûlûtê ji Dadgeha Cezayê Giran a 2'yan a Îzmîrê re şand.
WÊ HEPSA MALÊ BIDOME
Serdozgeriya Komarê ya Îzmîrê lêpirsîna der barê rojnameger Semra Tûran, Tolga Guney û Melîke Aydinê de temam kir. Serdozgeriyê îdianameyê bi "endamtiya rêxistinê" amade kir û şand Dadgeha Cezayê Giran a 13'an a Îzmîrê. Dadgehê duh îdianameyê qebûl kir. Di îdianameyên ku cuda hatin amadekirin de, danişîna dozê wekî 10 Sibatê hat diyarkirin. Dadgeha ku îdianameyê qebûl kir, daxwaza rakirina biryara hepsa malê û kontrola edlî bi hinceta "delîl nehatine komkirin" red kir.
Di îdianameyan de hat îdiakirin ku rojnamevan "endamên rêxistinê" ne. Dozger îdianameyan spart beyanên şahida eşkere Bûse Aydin û îtirafkar Umît Akbiyik û şahidê veşarî yê bi koda "K8Ç4B3LIT5". Ji ber ku îdianame bi rêbaza kopîkirinê hatine amadekirin, paşnavê îtirafkar Umît Akbiyik wekî "Dîkbayir" hatiye dubarekirin.
Di îdianameyan de ku di 5 rûpelên ewil de avabûn, dîrok û armanca PKK’ê hatiye ravekirin, bi îfadeyên şahidên eşkere û veşartî û îtîrafkar hewl hatiye dayîn ku têkilî di navbera rojnamegeran û PKK’ê de bê danîn. Di îdianameyan de têkiliya nûçeyên rojnamegeran ên der barê tecrîda li ser Rêberê PKK'ê Abdullah Ocalan, jinan, ekolojî û siyasetê de bi "endamtiya rêxistinê" re hatiye danîn. Di îdianameyê de, gera rojnamegeran û hevdîtina bi çavkaniyên nûçeyan re cih girtine û ev wekî sûc hatine hesibandin.
Di îdianameyê de şahidê/a bi koda "K8Ç4B3LIT5" ji bo rojnamevan Tûranê gotiye girêdayî "Komîteya Çapemeniyê ya KCK'ê ye". Di îdianameyê de gelek nûçe yên der barê Newrozê û jinan û tundiya li ser jinan de wekî "xebatên rêxistinê" hatine lîrovekirin û sûc hatine hesibandin.
Her wiha di îdianameyê de qeydên Tûranê yên bi çavkaniyên nûçeyan re jî cih girtine. Hevdîtina wê ya telefonê ya têkildarî birîna darên li Daristana Akbelenê ya bi çavkaniya nûçeyê re û ya bi karkerên Seraya Agrobayê re wekî delîlên sûc hatine nirxandin.
Her wiha dozger li gor beyanên şahidê/a veşarî ya bi koda "K8Ç4B3LIT5" tevgeriyaye û îdia kiriye ku nûçeya der barê kana keviran a hat xwestin li Zozana Kozak a BErgama Îzmîrê bê çêkirin û nûçeyên der barê madena zêran a li Bergamayê de jî li gor daxuyaniyên Komîsyona Ekolojiyê ya KCK'ê hatine çêkirin.
Di îdianameya der barê rojnamevan Melîke Aydinê de jî hatiye îdiakirin ku bi fermana "rêxistinê" nûçe çêkirine.
MA / Tolga Guney