ENQERE - Platforma Piştevaniya Edaletê damezirandina xwe ragihand û got: “Em li bendê ne ku her kes tev li Piştevaniya Edaletê bibe. Deriyên me her tim ji her kesên ji bo mafan têdikoşin vekirî ye. Werin em bi hev re piştevaniyê mezin bikin û daxwazên xwe xurttir bidin bihîstin.”
Pêkhateyên Piştevaniya Edaletê ji bo ragihandina avakirina Platforma Piştevaniya Edaletê li Avahiya Yekitiya Mulkiyeyiyan a Enqereyê daxuyanî da. Endamên platformê, rêxistina DEM Partiyê ya Enqereyê û rêxistinên girseyî yên demokratîk jî tev li bûn. Li eywana daxuyaniyê pankarta “Edalet, ji bo me tevan; a niha” hate hilayîstin. Daxuyanî ji hêla Hevserokê Şaxa ÎHD’a Enqereyê Omer Faruk Yazmaci, Done Yilmaz û Kezban Kalin ve hate xwendin.
‘HER DERA WELÊT DIŞEWITE’
Yazmaci, diyar kir ku ew demekî giran dijîn û got: “Heq, hiqûq, exlaq, edalet û nanê me ji hêla zaliman ve hatiye binpêkirin. Li welatê xwe em mehkûmî zext, dîltî û zilmê hatine kirin! Bêedaletiyê, jiyana me veguherandiye zindanê. Agir ketiye mala her kesî. Yên canê wan diêşe, li edaletê digerin. Ji bo canên ji ber bêedaletiya zaliman dişewitin em bibin dilopekê avê, li rex heqîqetê cih bigirin. Hêvî û daxwaza ku em dixwazin bigihînin dilê hemû mazluman ev e; em mazlum tevek bibin yek! Dilên xwe yên cuda cuda li edaletê digerin bikin yek! Bi dilekî sivîl û bêîtaet re em ji bo edaletê, ji bo wijdanê, li dijî sepanên neheq û bêedalet, li dijî kesên bi sepanên keyfî jiyana me veguherandin dojehê, ji bo hindik avê li vê şewatê bireşînin, ji bo azadî û nanê xwe, em vê têkoşînê mezin bikin. Em bangî dilê hemû canên li edaletê digerin dikin; Bi wijdaneke ku bi rastiya ‘qebûlkirina zilmê, zilm bi xwe ye’ dizane re em dilên xwe bikin yek.”
‘CUDAHIYÊN ME, ME BÊHTIR DEWLEMEND DIKIN’
Done Yilmaz jî anî ziman ku bi avakirina Platforma Piştevaniya Edaletê ew dixwazin bibin dengê her kesî û tora piştevaniyê ava bikin. Done Yilmaz, wiha domand: “Tevgera me, di wê baweriyê de ye ku cudahiyên me, me bêhtir dewlemend dikin û edalet divê ji bo her kesî ye. Nêrîn û nasnameyên cuda hatin gel hev û ev tevger ava kirin û sedema wê jî ew e ku platformeke ku kes bikarin dengê xwe lê bidin bihîstin, fikrên xwe bi awayekî azad bînin ziman û ji bo guherîna civakî bikarin bi hev re bixebitin. Tevgera me, armanc dike ku kesên ji derdorên cuda yên civakê bînin gel hev, di lêgerîna an edaletê de li cem wan cih bigire. Ji bo tevlibûna ‘Piştevaniya Edalet’ gelek sedemên binirx hene. Ev tevger, dê nîşan bide ku di lêgerîna edaletê de kes bi tenê nînin û dê piştevaniyeke xurt bide wan.”
‘EM BIRÇIYÊN EDALETÊ NE’
Done Yilmaz, got ku civak dema bi yekitî tevdigere bihêz e û wiha pê de çû: “Li goî me yekitî, di cîbicîkirina edaletê de gavekî girîng e. Em tevek jî xwedî tecrûbe û nêrînên cuda ne û ev rewş dê ji bo avakirina civakeke berfireh û adilane bibe alîkar. Em tevek jî jiyanên cuda dijîn, jiyanê bi zehmetiyên cur bi cur pêşwazî dikin. Lê li cihekî em digihin hev. Weke Piştevaniya Edaletê, em her kesên ji derdorên cuda yên civakê tînin ba hev, ji bo dengê xwe bihêztir û bibandortir bikin jî dibin yek. Platforma me dê li dijî bêedaletiyan bisekine û armanc dike ku di navbera nasname û nêrînên cuda de bibe pirek. Em, ji rabûrdî, nasname û nêrînên cuda tên lê em tevek jî birçiyên edaletê ne. Em dizanin ku gelek caran dengê kesên li her çar aliyên welêt ji bo edaletê têdikoşin nayê bihîstin ji ber ku ev têkoşîn mîna giravên biçûk in, ji hev cuda tên meşandin. Em jî ji bo wê hene ku van giravên biçûk bikin yek û dengê xwe bi hev re bidin bihîstin.”
‘EDALET MAFÊ ME TEVAN E’
Kezban Kalin jî daxuyand ku hemû derdorên cuda di nava lêgerîna maf de ne û ev tişt anî ziman: “Em tevek jî li noqteyekê rastî bêedaletiyên pergalê hatin an jî bûn şahidên wê. Nasname, rabûrdû û îdeolojiya we çi dibe bila bibe di lêgerîna me ya edaletê de cihê we heye. Dengê we dema bi dengên din re bû yek, dê bihêztir bibe. Em, ji bo her kesên li edaletê digerin bînin cem hev û vî dengî mezintir bikin li vir in. Dema me bi destên hev girt dê têkoşîna maf xurtir bibe û dê bigihije gelek kesan. Îro, mirovên li gelek deverên cuda yên ji bo mafên xwe têdikoşin, li cihên xwe yên biçûk, mîna ku ji hev hatibin îzolekirin têdikoşin. Weke ‘Piştevaniya Edaletê’, em dixwazin van têkoşînên ji hev cuda mayin bînin gel hev û tora piştevaniyê ava bikin. Ji ber ku em dizanin ku tenê dema em bi hev re tevgeriyan dikarin edaletê cîbicî bikin. Edalet, mafê me tevan e û divê tu kesên ji bo van mafan têdikoşin bi tenê neyên hiştin. Bûyîna parçeyeke vê piştevaniyê, ne tenê dayina bihîstin a dengê we ye, di heman demê de xurtkirina têkoşîna kesên cuda jî ye. Em bi hev re dê bihêztir bibn, bibandortir bin û bêhtir xuyanî bin.”
‘TÊKOŞÎNA EDALETÊ BI TENÊ NAYÊ DOMANDIN’
Kezban Kalin, bi lêv kir ku yek ji nirxên herî girîng a mirovan dike mirov jî bi dilwêrekî parastina mafên kesên din e û axaftina xwe wiha qedand: “Parastina mafên xwe her çende girîng jî be, insanetî wê demê dest pê dike dema mirovî li dijî neheqiyên li kesên cuda tên kirin dengê derxist. Têkoşîna edaletê, bi tena serê xwe nayê domandin. Dîrok nîşan dide ku guherînên civakî piranî bi hewldanên kolektîf pêk tê. Bi tevgerîneke bi hev re em ê bêhtir xurt bin û dengê me bibandortir be. Piştevaniya hev a kom û derdorên cuda, di lêgerîna edaletê de yekitiya hêzê çêdike û bandora civakî zêdetir dike. Gelemperî dengên şexsî nayên bihîstin an jî bêbandor dibin. Lê belê dengên bi piştevaniyê bûne yek, xwedî hêza guherînê ne. Dengekî hevpar, hêsan dike ku zanebûneke civakî ya têkoşîna edaletê ava bibe û guherînên polîtîk pêk bên. Em li bendê ne ku her kes tev li Piştevaniya Edaletê bibe. Deriyê me ji bo her kesên ji bo heqê xwe têdikoşin û birçiyên edaletê vekirî ye. Werin, em bi hev re piştevaniyê mezin bikin û daxwazên xwe bi xurtir bidin bihîstin.”