Bi pêşengtiya Platforma Saziyên Demokratîk û di çarçoveya kampanyaya “Ji Abdullah Ocalan re azadî, ji bo pirsgirêka Kurd çareseriya demokratîk” de starta “Meşa Çareseriya Demokratîk û Azadiyê” hate dayin. Di vê çarçoveyê de ji Amedê ber bi Enqereyê ve meş hat destpêkirin. Girse li pêşiya Rêxistina Partiya Herêmên Demokratîk (DBP) a Amedê kom bû. Hevserokên Giştî yên DBP’ê Çîgdem Kiliçgun Uçar û Keskîn Bayindir, Hevserokê Kongreya Civaka Demokratîk (KCD) Berdan Ozturk, endamê MYK’a Partiya Sosyalîst a Bindestan (ESP) Orhan Çelebî, rêxistinên bajar û navçeyan ên Partiya Wekhevî û Demokrasiyê ya Gelan (DEM Partî), aktîvîstên Tevgera Jinên Azad (TJA), hevşaredarên navçeyan, parlamenter û gelek nûnerên rêxistinên civaka sivîl jî tev li bûn. 

 

Şandeya ku dê biçe Enqereyê pêşmalkên bi nivîsa “Meşa Çareseriya Demokratîk û Azadiyê” li xwe kirin. Girseyê dovîzên “Çareseriya demokratîk, welatê demokratîk”, “Em ji bo çareseriyê biisrar in, dê azadî bi ser keve” û “Jin, jiyan, azadî” hilgirtin. 

 

Girseyê tililî avêt û bi dirûşmên “Em ê bi berxwedanê bi ser kevin” û “Bijî berxwedana gele Kurd” xwest ber bi Qada Şêx Seîd ve bimeşe. 

 

Polîsan, rêya avahiya rêxisina DBP’ê ya bajar bi bariyeran girtin û nehiştin girse derbas bibe. Girseyê bi dirûşmên “Berîqet nikarin me têk bibin”, “Bijî Serok Apo”, "Bi can bi xwîn em bi te re ne ey Serok”, “Kurdistan dê ji faşîstan re bibe goristan” û bi çepikan astengkirina polîsan protesto kirin. 

 

Li dijî astengkirina polîsan, meşvanên “Meşa Çareseriya Demokratîk û Azadiyê” piştî daxuyaniyê hatin oxirkirin. Di daxuyaniyê de Hevseroka Giştî ya DBP’ê Çîgdem Kiliçgun Uçar axivî. 

 

‘HÛN NEBÎNIN JÎ PIRSGIRÊKA KURD HEYE’

 

Çîgdem Kiliçgun Uçar, spasiya xelkê Amedê kir ku tevî astengkirina polîsan jî xwedî li Rojava derket. Çîgdem Kiliçgun Uçar, wiha domand: “Ewqas tengezar bûne ku li Sûriyeyê, li Rojava hevkariyê bi çeteyan re dikin û gefan li me dixwin. Em ji bo çareseriya demokratîk û azadiyê li vir in. Hûn nebînin jî, nebihîsin jî li vî welatî Kurd hene. Li vî welatî pirsgirêka Kurd heye, Kurdên li ber xwe didin hene. Em lewma li vir in û dengê xwe bilind dikin.” 

 

Bi domdarî Çîgdem Kiliçgun Uçar da zanîn ku li Sûriyeyê bi wekaleta NATO û Tirkiyeyê rejîmeke şerîatê tê avakirin û wiha pê de çû: “Hêza herî ne rewa ya li dijî têkoşîna gelê Kurd HTŞ a wan e. Ji 2011’an ve hêza herî rewa rêveberiya Rojava ye. Hûn hewl didin bi destê çeteyên ku hûn nizanin dê sibe çi bikin re, bi şer re Rojava dîzayn bikin. Lê belê Rojava bi fikriyata birêz Ocalan teşe girt. Yên ku li hemberî vê teşegirtinê rewabûna xwe winda kirin Tirkiye ye, HTŞ û SMO ye. Îradeyeke dest ji azadiyê bernade heye. Ev îradeye dibêje ku divê birêz Abdullah Ocalan ê we xistiye tecrîdê azad bibe.” 

 

‘BI MILYONAN KES AZADIYA BIRÊZ OCALAN DAXWAZ DIKIN’ 

 

Di berdewamê de Çîgdem Kiliçgun Uçar diyar kir ku li gorî hiqûqa navxweyî ya Tirkiyeyê divê Abdullah Ocalan azad bibe û wiha derbirî: “Bi milyonan kes bi birêz Ocalan re ye û divê azad bibe. Li dijî şerê li her derê, çareseriya demokratîk û aştiyê diparêze. Bi milyonan kesan dev ji îradeya xwe bernedaye. Bi milyonan kes ev 26 sal in li dijî tecrîdê derdikevin û têdikoşin. Hûn nikarin vê jinedîtî ve bên. Tirkiye hewl dide ji bo dagirkirinê êriş dike. Hûn nikarin Kurdên li Rojava û yên li Tirkiyeyê ji hev qut bikin. Em lewma li vir in. Em ê her tim Rojava biparêzin. 

 

MAFÊ STATÛYA GELÊ KURD REWA YE

 

Rojhilata Navîn gelek komkujî, şer, Nemrûd û dîktator dîtin. Lê dîrok îro qala berxwedêran dike. Hemî dînamîkên demokratîk li ser pêyan e. Mafê statûyê yê gelê kurd rewa ye. Mafê berxwedanê rewa ye. Li Stenbolê rewşenbîran bang kirin. Gotin; ‘çareseriya demokratîk a pirsgirêka Kurd pêkan e. Meseleyeke ewqas dîrokî ye ku nabe ji dewletê re bê hiştin.’ Em bang li hemû gel û dînamîkên Tirkiyeyê dikin. Roj ne roja sekinînê ye. Roj ne ew roj e ku dîrok ji çeteyan re bê hiştin. Roj roja xwedîderketina li gelê Rojava ye. Divê dengê aştiya birûmet bilind bibe. Em ê îro li Amedê, sibe li Rihayê, li Dîlokê li Edene, Mêrsîn û Enqenreyê van gotinan bikin. 

 

BANG KIR 

 

Meşa me, meşa cîbicîkirina aştiya birêz Ocalan birêve dibe ye. Têkoşîna gotina jinên berxwedêr ên li dijî DAIŞ’ê û peyrewên wê şer kirin e. Dengê Kurd, Êzidî, Ermenên hatine qetilkirin e. Em muhsabeya qirkirin, pişaftin, înkara sed sale tê domandin dikin û dewlet jî mecbûr e bike. Netewe dewlet çareserî nîne. Em ji bo avakirina pergaleke nû banga têkoşîna hevpar dikin. Êdî dawiya we hat. Yên pişta xwe bi SMO û çeteyan germ dikin, bila berê xwe bidin têkoşîna gelê Kurd. Li wir ji bo hemû gelan îradeyeke taybet heye. Dema birêz Ocalan têkoşîna xwe dimeşand, li Rojhilata Navîn li ser navê Kurdan valahî hebûn. Em, ji bo dagirtina van valahiyan derdikevin rê. Ew valahî li Rojava hate dagirtin. Em dibêjin ku çareseriyeke demokratîk pêkan e û dibêjin ku azadiya birêz Ocalan ji bo çareseriya demokratîk gava herî girîng e. Dê têkoşîna me her bidome. Me soz daye jinan, soz daye kesên emrê xwe bi têkoşîna azadiyê ya Kurdan re derbas kirin, yên zarokên xwe winda kirin. Ya ku ev welat heq dike, aştiyeke birûmet e. Heta ku aştî pêk tê û birêz Ocalan azad dibe jî em ê meşa xwe bidomînin.” 

 

Piştî çalakiya rûniştinê, şandeya ku dê biçe Enqereyê bi çepik û tililiyan hate birêkirin.