Konferansa Jinan a Rojhilata Navîn a 2'yemîn bi beşdariya zêdeyî 100 delegeyên ji bajarên cuda yên Rojhilata Navîn û Bakurê Efrîkayê, li paytexta Lubnan Beyrûdê dest pê kir. Konferans wê 2 rojan dewam bike û rewşa heyî ya Rojhilata Navîn bê nirxandin û danheviya têkoşîna jinan a li herêmê bê parvekirin.

 

Konferansa Jinan a Rojhilata Navîn ku cara ewilî sala 2013'an li Amedê pêk hat, îro li Beyrûdê serê sibehê bi peyaman dest pê kir. Bi navê Komîteya Amadekar Hanan Osman axivî û Koordînasyona KJK'ê, Yekîtiya Jinanî Kurdistan ku rêxistina jinan a YNK'ê ye, ji Şengalê Tevgera Azadiya Jinê ya Êzidxanê (TAJÊ) û bi navê girtiyên siyasî yên li zindanên Tirkiyê jî Leyla Guven peyam şandin.

 

ŞER-NAKOKÎ Û ROLA JINAN

 

Di rûniştina destpêkê ya konferansê de krîzên heyî yên li Rojhilata Navîn û Bakurê Efrîkayê û rola jinan hatin nîqaşkirin. Ji Yemenê Anjela Al Mumary rûniştina destpêkê bi rê ve bir û ji Lubnanê ji Saziya Jinê ya Jîn Buşra Alî, ji Îranê Meryem Zolfagharîanalîabad, ji Fasê Hatîce Riyadî û ji Bakur Rojhilatê Sûriyeyê Lîna Bereket axivîn.

 

Buşra Alî bi sernavê "Şer-nakokiyên 10 salên dawî û rola me" axivî û bal kişand ser Şerê Cîhanê yê Sêyemîn ku di navbera hêzên kapîtalîst ê global û dewletên herêmê yên statukoparêz de diqewime. Alî diyar kir ku aloziya salên dawî parçeyek ji vê rewşa 10 salên dawî ye û destnîşan kir ku li gel van aktoran weke dînamîka sêyemîn jî bi pêşengiya jinan têkoşîna civakî tê meşandin. Buşra Alî destnîşan kir ku têkoşîna azadiya jinan a li herêmê bi qasî ku pêşengî ji têkoşîna azadiya civakî re kir wê bi ser bikeve.

 

'HEWLDANÊN RÊXISTINBÛNÊ YÊN LI ÎRANÊ ZÊDE NE'

 

Parêzvana Mafên Mirovan a li Îranê Meryem Zolfagharia jî bi mijara "Li herêmê netewe-dewlet û rastiya desthilatdariyê" axivî û bi taybetî bal kişand ser bandora zayendîperestî, olperestî û neteweperestiyê. Zolfagharia di vê çarçoveyê de rewşa li Îranê nirxand û anî ziman ku li Îranê temenê zewacê weke 13 hatiye diyarkirin, lewma zewicandina di temenê zarokatiyê de zêde bûye. Meryem Zolfagharia anî ziman ku zextên giran li aktîvîstên jin tê kirin û rewşa girtiya siyasî Zeynep Celaliyan bi bîr xist. Zolfagharia her wiha destnîşan kir ku niha li Îranê hewldanên jinan ên ji bo rêxistinbûnê zêde ye.

 

'DESTAVÊTIN WEKE AMÛREKE ÊŞKENCEYÊ TÊ BIKARANÎN'

 

Ji Meclîsa Jinê ya Sûriyeyê Lîna Bereket jî bal kişand ser bandora şer ku li jinan dibe. Bereket diyar kir ku bi taybetî tundiya li dijî jinan zêde bûye û destavêtin jî weke amûreke zext û êşkenceyê tê bikaranîn. Bereket diyar kir ku ji bo fihûşê jî argumanên olî tên bikaranîn. Bereket her wiha têkildarî bûyerên tundiya li jinên li Sûriyeyê hin dane parve kir. Li gorî vê yekê ji sedî 40 ê penaberên Sûriyeyî jin in. Yek ji çar parên jin ên penaber jî bi tena serê xwe zarokên xwe xwedî dikin. Di encama vê yekê de jî zewicandina di temenê zarokatiyê de zêde bûye.

 

Konferansê bi rûniştina bi sernavê "Li Rojhilata Navîn û Bakurê Efrîkayê danheviyên têkoşînê yên jinan" dewam dike. Rûniştin ji aliyê rojnamevana Misrî Noûr El Hoda Zakî ve tê birêvebirin û ji Tirkiye û Bakurê Kurdistanê Parlamentera HDP'ê ya Mûşê Gulistan Koçyîgît, Parlamentera HDP'ê ya Hatayê Tulay Hatimogûllari, ji Lubnanê Heyat Mîrşad, ji Urdunê Îman el Huseyîn û ji Iraqê jî Şamîran Odesho tevlî bûne.

 

Ji Lubnan, çar parçeyên Kurdistanê, Tirkiye, Iraq, Îran, Sûriye, Misir, Yemen, Tûnis, Sûdan, Efganistan, Urdun, Lîbya, Fas û Fîlîstînê jinên rêxistinbûyî tevlî konferansê bûne.