Li Rihayê amadekariyên pîrozbahiya Newroza bi dirûşma “Dem dema serkeftinê ye” dê bê lidarxistin. Pîrozbahiyên Newrozê dê di 19’ê mehê de li navçeya Pirsûsê, di 20’ê mehê de li navenda Rihayê û di 21’ê mehê de jî li navçeya Wêranşarê bê lidarxistin. Newroza Rihayê dê li Stadyuma 11’ê Nîsanê were lidarxistin. 

 

‘EM Ê BIBIN LEHÎ’ 

 

Yusuf Berk ê 81 salî ku 25 li bajêr tevli pîrozbahiyan dibe diyar kir ku ew ê bibin lehî û biherikin qada Newrozê û banga tevlibûnê li xelkê Rihayê kir.

 

‘NEWROZA AZADIYÊ’ 

 

Muhammet Uygur (48) jî anî ziman ku ew dixwaze tevahiya xelkê Rihayê biherikin qada Newrozê û govenda aazadiyê bigirin. 

 

‘DÊ LI DIJÎ ZILMÊ RABIN’ 

 

Ramazan Karakuş (46) jî got ew ê tevli Newrozê bibin û çawa ku Kawayê Hesinkar li dijî zilmê serî hilda dê ew jî li dijî zilmê derkevin. 

 

‘EM Ê AZADIYA OCALAN DAXWAZ BIKIN’ 

 

Muhammed Şîmşek (60) jî diyar kir ku ew her sal bi malbata xwe re tevli Newrozê dibe û got: “Newroz ji Kawayê Hesinkar wek mîras ji bo me maye. Em ê li qada Newrozê azadiya Ocalan daxwaz bikin. Em dixwazin zilma li ser gelê me bi dawî bibe.” 

 

‘DÊ BIBE NEWROZA AŞTIYÊ’ 

 

Naîle Kaplan (50) jî da zanîn ku ew ê bi cilên xwe rengîn tevli Newrozê bibe û dê ev Newroz ji bo wan bibe Newroza serkeftinê û aştiyê. 

 

‘EM Ê SERKEFTINA XWE RAGIHÎNIN’ 

 

Xezal Çam (53) jî anî ziman ku ew dixwazin ev Newroz bibe wesîleya aştiyê û çawa ku Kawayê Hesinkar bi agirê vêxist serkeftina xwe ragihand dê ew jî bi vêxistina agirê Newrozê serkeftina xwe ragihînin. 

 

‘EM Ê BI RENGÊ XWE TEVLI BIBIN’ 

 

Berfîn Çîçek (23) jî destnîşan kir ku Newroz ji bo wê tê wateya têkoşîn û berxwedanê û ev Newroz ji bo wan girîng e û dê bi tîlîlî û reng û daxwazên xwe tevli pîrozbahiya Newrozê bibin. 

 

‘DÊ BIBE RESMÊ TÊKÇÛNA ÎKTIDARÊ’ 

 

Muhsin Aydogdu (24) jî ew ê bi tevlibûna xwe û resmê nîşan bidin dê bibe têkbirina îktidarê û xwest li Rihayê her kes tevli pîrozbahiya Newrozê bibe. 

 

BERNAME 

 

Cîgira Seroka Koma HDP’ê Meral Daniş Beştaş, Serokê Giştî yê Partiya Komunist a Kurdistanê (KKP) Sînan Çîftyurek, Parlamenterê HDP’ê Nusettîn Maçîn dê wek axiver tevli pîrozbahiyê bibin. Hunermend Rojda, Erdogan Emîr û Koma Hevra jî dê derkevin ser dika Newrozê û stranan bistrin. 

 

MA / Emrûllah Acar