ŞIRNEX - Dayikên şirnexî ku tev lî Nobeta Jiyanê bûn, bertek nîşanî êrişa Tirkiyeyê ya li ser Herêma Kurdistanê û hevkariya PDK'ê ya di vê êrişê de dan û ev tişt gotin: "Êdî baweriya me bi Barzanî nayê. Kesê ku rabe kurdan bikûje mirov çawa baweriya xwe bi wî bîne.
Tirkiyeyê di 17'ê nîsanê de bi hevkariya Partiya Demokrata Kurdistanê (PDK) ji hewa û bejahiyê ve êrişî herêmên Zap, Metîna û Avaşînê yên Herêma Kurdistanê kir. Li dijî êrişê ku li dijî Herêma Kurdistanê hat destpêkirin, di 2’ê nîsanê roja cejnê de bi dirûşmeya “Li dijî şer aştî, li dijî kuştinê jiyan” rêxistinên HDP'ê yên navçeyan û navenda Şirnexê çalakiya “Nobeta Jiyanê” dan destpêkirin. Çalakiya ku du rojan berdewam kir, duh bi tevlîbûna sedan kesî bi dawî bû.
Dayikên tev li çalakiya Nobeta Jiyanê bûn, ji ajansê me re axivîn û xwestin kurd tifaqa xwe ava bikin.
'EM LI DIJÎ ŞER IN'
Dayik Naîle Tûnç, diyar kir ku Barzanî dijminatiya gelê kurd û piştgiriya dewleta tirk dike û wiha got: "Ew bi xwe jî kurd e, lê êrişê kurdan dike û wan dikuje. Em şer naxwazin. Em dixwazin azadî û aştî pêk bê. Barzanî ji bo çi vê tiştê dike? Mirov çawa xwe difiroşe? Ew ji kurdan çi dixwaze? Gelê Şengalê bi tenê parastina xwe dikin. Lê rabûn çûn êrişê wir kirin. Ji gelê êzidî çi dixwaze? Êdî baweriya me bi Barzanî nayê. Kesê ku rabe kurdan bikuje mirov çawa baweriya xwe bi wî bîne. Ger ku PDK’ê piştgiriyê nedayê wê dewleta tirk nikaribûna erişî Başûr bikira. Em li dijî şer in. Em jiyanek wekhev û aştiyane dixwazin. Êrişê çiyayên me dikin û zarokên me dikujin. Bila dev ji vê hovîtiyê berdin. Em tifaqa bi Barzanî re naxwazin. Divê em kurd bi xwe bibin yek û yekitiya xwe ava bikin. Barzanî rêya dewleta tirk vedike. Barzanî birayê me nîne û em wî nelet dikin. Li çar aliyê Kurdistanê divê gelê kurd û bi taybetî dayik rabin ser piyan û dest bidin hev. Em li dijî kuştin û şer bisekinin."
‘EM ÎXANETA BARZANÎ JI BÎR NAKIN'
Hevseroka HDP’a Bajaroka Dêrgulê Zozan Denîz jî ji ber piştgiriya wê ya Tirkiyeyê PDK’ê şermezar kir û wiha axivî: "Em tu carî îxaneta Barzanî ji bîr nakin. Em êdî şer naxwazin. Bi salan in em kurd tên kuştin. Em dibêjin êdî bes e. Mirovekî ku kurd be çawa îxanetê li gelê xwe dike? Tişta ku Barzanî îro dike tu kes qebûl nake. Li dijî vê îxanetê divê tu kes bêdeng nemîne. Ji bo menfeata xwe piştgiriya dewleta tirk dike. Em jiyanek azad û wekhev dixwazin. Li dijî vê îxanetê divê gelê kurd li çar aliyê welat ser piyan. Li şûna ku piştgiriya kurdan bike piştgiriya dewleta tirk dike. Barzanî ku kurd e çima li dijî PKK’ê şer dike. Em vê komploya li ser gelê Kurd û gelê Başûr şermezar dikin. Bila Barzanî beriya ku dereng bikeve ji vê rêya şaş vegere. Em biratiya Barzanî qebûl nakin. Ew ji Erdogan re biratiyê dike. Mirov çawa rê dide dijminê xwe. Roj roja xwedî derketinê ye. Em xwedî li nirx, vîn û nasnameya xwe derbikevin. Em hene û em xilas nabin û em ê hebin."
'DIJMINÊ KURDAN JÊ RE NABIN DOST'
Endama Meclisa Dayika Aştiyê ya Silopiyê Taybet Tatli, bang li Barzanî kir ku destên xwe ji ser kurdan vekişîne û ev tişt anî ziman: "Bila piştgiriya dewleta tirk neke. Bila dawî li van oprasyonan bînin. Em naxwazin zarokên me bên kuştin. Banga min li dayikên cerdevan û leşkeran; bila destên xwe nedin destê dijmin û xwînmijan. Wê heta kîngê dijmin çiya û daristanên me gulabaran bike û bişewitîne. Çi ji me kurdan dixwazin? Biratiya kurdan û Barzanî êdî nemaye. Em vê biratiyê qebûl nakin. Ger ku Barzanî bi biratî nêzî me bibûya dê piştgiriya dewleta tirk nekira. Zarokên me bi çekên kîmyewî tên kuştin. Ger ku îro çiyayên Kurdistanê tên gulebarankirin û zarokên me tên kuştin berpirsyarê vê Barzanî ye. Qet ji navê xwe şerm nake. Dema DAIŞ'ê êrişî Barzanî kir kê wî xelas kir? Çawa wan rojan ji bîr kir. Em Barzanî nelet dikin ku vê hevkariyê dike. Bila destên xwe ji vê qirêjiyê vekişîne. Ji vê rêya şaş vegere. Em ê tu carî vê îxanetê ji bîr nekin. Dewleta tirk îro tiştê ku bi me dike dê sibê bi wî jî bike. Ji dijminê kurdan jê re nabe bira û dost. Barzanî bila vê baş bizanibe."
'JI DESTÊ KÊ ÇÊ TÊ BILA BIKE'
Endama Meclîsa Dayika Aştiyê ya Silopiyê Emîne Alkiş jî destnîşan kir ku ew bi salan e daxwaza azadî û aştiyê dikin û wiha got: "Em kurd şer naxwazin. Bila gelê kurd rabe ser piyan û li ber xwe bide. Ger ku em ranebin dê tu kes ji bo me ranebe ser piyan. Bi taybetî jî divê em dayik rabin ser piyan. Êdî baweriya me bi Barzanî nayê. Barzanî gelek dilê me dayikan şewitandiye. Heta niha me tu qenciya wî nedîtiye. Her tim piştgiriyê dide neyarê me kurdan. Barzanî ji vê rêya şaş vegere. Em dayik tu carî Barzanî efû nakin. Hemû çiyayên me yên Kurdistanê bi çekên kîmyewî şewitandin. Baweriya me kurdan pê nayê. Ger ku Barzanî kurd bûya dê vê hovîtiyê nekira. Bila hemû dayik dest bidin hev û li dijî vî şerî dengê xwe bilind bikin. Ji ber îxaneta Barzanî kurd nagihîjin armanca xwe. Li dijî zilmê em ê dengê xwe bilind bikin û rabin serhildanê. Divê hemû gelê me rabe ser piyan. Bila tu kes di malên xwe de rûnenê. Ji heft saliyan heta heftê saliyan ji destê kê çê tê bila bike. Em ê her tim çalakiyên xwe yên nobetê bidomînin. Dilê me dayikan dişewite. Bila ev bêdengî bê şikandin."
‘Barzanî û hikûmeta AKP’ê mirovên hevdûne’
Cemîle Acar jî bi lêv kir ku wê tu carî kurd xelas nebin û ev tişt anîn ziman: "Di dilê Erdogan de rihm tuneye. Mirovek zalim e. Jin, zarok, ciwan, kal û pîran dikuje. Kesekî ku misilman be çawa vî tiştî dike. Mirov qet ji xwe fedî nake? Ew çi ji bajarên kurdan dixwaze. Çiyayên me dişewitînin û darên me dibirin, zarokên me dikujin, hestiyên me winda dikin. Zalimê zalim me kurdan çi bi te kiriye? Em piştgiriya Barzanî û Tirkiyê jî şermezar dikin. Barzanî û hikûmeta AKP’ê mirovên hev in. Ger ku ew Barzanî baş bûya dê neçûya Stenbolê hevdîtinê nekira. Barzanî qet ji xwe fedî nake? Darên çiyayên me dibirin û dişewitînin. Barzanî ji bo Erdogan kurdan dikuje. Tifaqa bi Barzanî re ne pêkan e. Barzanî ne hevalê kurdan e. Barzanî îxanet dike. Divê gelê me vê bêdengiyê bişikîne. Ger ku em kurd bi xwe tifaqa xwe ava nekin em ê tune bibin. Em ê bibin yek û li dijî şer dengê xwe bilind bikin. Barzanî ji bo xwe tu tiştî nekiriye, dê ji bo min çi bike. Barzanî bûye dijminê kurdan. Bila kurd biratiya xwe ava bikin."