Lijneya Rêveberiya Navendî (MYK) a Partiya Herêmên Demokratîk (DBP) têkildarî tayînkirina qeyûman a li Şaredariya Bajarê Mezin a Mêrdînê û şaredariyên Êlih û Xelfetî ya Rihayê daxuyaniyeke nivîskî weşand. 

 

DBP’ê diyar kir ku tu hukmê biryara tayînkirina qeyûman ji bo wan tune ye û wiha hate gotin: “Îktîdara AKP-MHP’ê careke din bi rêya qeyûman îradeya gel tune hesiband û îradeya gel xesp dike.” DBP’ê destnîşan kir ku îktîdara AKP-MHP’ê di siyasetê de tune dibe û rêya xwexelaskirinê jî di şerê topyekûn ê li dijî gelê kurd de dibîne. 

 

MEKANÎKA DARBEYÊ DI MERIYETÊ DE YE

 

Bi domdarî DBP’ê da zanîn ku tiştekî rasthatî nîne ku di salvegera darbeya siyasî ya 4’ê Mijdara 2016’an a li dijî siyasetmedarên kurd de qeyûm hatine tayînkirin. DBP’ê diyar kir ku îktîdarê konsepta darbeyê nû kiriye û tiştên îro diqewimin jî encama wê ye. DBP’ê diyar kir ku di ajandaya rejîma AKP-MHP’ê de ji bo kurd şer, qirkirina çandî û siyasî heye. DBP’ê wiha domand: “Xuyaye ku polîtîkayên qeyûm re di neçareserkirina pirsgirêka kurd de israr dikin. Eşkereye ku îktîdara Erdogan-Bahçelî di nava wan hewldanan de ne ku pirsgirêka kurd bi darbeyên siyasî, operasyonên leşkerî û qirkirinên çandî û etnîkî çareser bikin.” 

 

‘EM Ê HETA DAWIYÊ LI BER XWE BIDIN’

 

DBP’ê, tayînkirina qeyûman weke darbeya siyasî nirxand û wiha got: “Bi vê biryara xwe peyama ‘ez hikûmeta darbeyê me’ dane. Di rewşa heyî de îktîdara AKP-MHP’ê rewatiya xwe winda kirye. Lewma jî tu hukmê biryarên îktîdara nerewa didin ji bo me nînin. Em vê biryarê nas nakin û dê rê nedin xespa qeyûm. Em ê heta dawiyê têkoşîna xwe ya demokrasî û azadiyê bidomînin û xwedî li gel derkevin. Em ê serî li ber vê zordestiyê netewînin û heta dawiyê li ber xwe bidin. Dê rêbazên berê hatine ceribandin nekarin we xelas bikin. Têkoşîn û îradeya gelê kurd dê bi we bide windakirin.”