Serê sibê ji bo Şaredariya Bajarê Mezin a Mêrdînê, Şaredariya Êlihê û Şaredariya navçeya Xelfetiyê ya Rihayê qeyûm hatin tayînkirin. Li Mêrdînê girse ji saetên serê sibê ve li ber avahiya şaredariyê li hev civiyan. Di çalakiyên ku tevî êrîşên polîsan jî tevahiya rojê dewam kirin de timî dirûşmên "AKP wê ji hesab bide gel", "Qeyûm biçe", "Mêrdîn ya me ye şeredari ya me ye" hatin berzkirin. Di saetên êvarê de daxuyanî hat dayîn. Hevseroka Giştî ya Partiya Herêmên Demokratîk (DBP) Çîgdem Kiliçgûn Uçar û Hevberdevka Kongreya Demokratîk a Gelan (HDK) Meral Daniş Beştaş, Hevserokên Partiya Wekhevî û Demokrasiyê ya Gelan (DEM Partî) Tuncer Bakirhan,  Tulay Hatimogullar, serokê Giştî yê CHP'ê Ozgur Ozel tevlî bûn.

 

'EM Ê LI BER XWE BIDIN'

 

Tuncer Bakirhan ku ewil li vir axivî diyar kir ku ew ê têkoşîna xwe berfireh bikin û got: “Em banga xwe ya ji Mêrdînê nû dikin: Dev ji vê pergala qeyûmê berdin, ev pergala qeyûm bi kêrî kesî nayê, ev pergala qeyûm îflas e. Dev ji vê zîhniyeta derewîn, talanê, qeyûmê berdin û bila hevserokên me vî bajarî bi rê ve bibin. Em ê nesekinin, em ê şer bikin. Em ê li ber xwe bidin, em soz didin ku em ê bi hev re têbikoşin heta ku aştî û edalet bi ser van xakan de were û gelê me bi nasnameya xwe bibe welatiyên wekhev."

 

Piştre Çîgdem Kiliçgûn Uçar axivî û diyar kir ku hikûmet bi êrîşên li ser destkeftiyên Kurdan hewl dide rê li ber xwe veke û destnîşan kir ku yekane çareserî Rêberê PKK'ê Abdullah Ocalan e ku li Îmraliyê di nava şert û mercên giran ên tecrîdê de ye. Ûçarê anî ziman ku desthilatdariya AKP-MHP'ê têk çû û got: "Ya ku bi ser ket gelê Kurd û hêzên demokrasiyê bû. Ji ber vê yekê êrîş dikin. Ji siyaseta qeyûm tiştek bi dest nexistine û wê ti tiştî bi dest nexin. Nobeda me wê li Êlih, Mêrdîn, Xelfetî û Esenyurtê bidome. Me bi hev re ji bo demokrasî, azadî û siberojeke ronî têkoşiya û em ê têkoşîna xwe bidomînin. Nirxên vî welatî ne nirxên ku dê teslîmî ti kesî bibe. Em ê li vir bin.Yekane rê azadiya Birêz Ocalan e ku li Îmraliyê di bin tecrîdê de tê ragirtin. "

 

Pişt re Hevberdevka HDK’ê Meral Daniş Beştaş axivî û diyar kir ku îradeya gel bi darbeya qeyûman hatiye desteserkirin û hikûmeta AKP-MHP’ê ragihand ku ew vîna gel nas nakin.Beştaşê got: "Gel we nexwest. Gel dengê xwe neda we. Namzetên DEM'ê ji sedî 57'ê dengan hatin hilbijartin. Em qeyûmê we yê ku bi derbeyê derbeyek derqanûnî pêk anî, nas nakin û qebûl nakin. Xelkê we nexwest, qeyûm tenê dikare li avahiya şaredariyê rûne û nikare we li derve temsîl bike. Faşîzma li Kurdistanê nikare bibe demokrasiya Tirkiyeyê."

 

Ozgur Ozel ku herî dawî mafê axaftinê girt, destnîşan kir ku desthilatdariya AKP-MHP'ê her tim li gorî vîna gel qeyûman tayîn dike, lê ew ê têkoşîna xwe bidomînin.

 

Daxuyanî bi berzkirina dirûşmeyên "Qeyûm bicehime" bi dawî bû.