DEM Partiyê di hilbijartinên 31’ê Adarê de Şaredariya Agiriyê ji AKP’ê stand. Ji roja şaredarî hatiye standin heta niha jî hevşaredar kolan bi kolan digerin û hewl didin pirsgirêkên gel çareser bikin. Rêveberiya DEM Partiyê hewl dide texrîbata şaredariya AKP’ê li pey xwe hiştî paqij bike. 

 

Ji serdema AKP’ê nêzî 505 milyon lîre deyn mabûn lê tevî vî deynî jî makîneyên kar hatin peydakirin û piraniya pirsgirêka binesaziyê hate çareserkirin. Di nava 9 mehan de 50 kîlometreyên rê hatin qîrkirin, 17 parqên bi temamî xera bûn ji nû ve hatin çêkirin û 3 parkên nû yên bi navên Mehmet Uzun, Keskesor û Ahmed Arîf hatin vekirin. Qada sergoyê ya berê veguherandin qada mesîreyê, ji hêla veguhestin û estetîka bajar ve xizmetên girîng hatin kirin û ji bo çareserkirina pirsgirêkên jinan jî Navenda Piştevaniya Jinê ya Zînê hate vekirin. Di heman demê de cara ewil ajokareka ji a otobûsan girtin kar. 

 

Şêniyên bajar têkildarî xizmetên şaredariyê ji ajansa me re axivîn û gotin ku ji pratîka şaredariyê ya 9 mehan razî ne. 

 

XIZMET

 

Muhlîs Yildiz, diyar kir ku ew ji xizmetên şaredariyê yên di demên dawî de gelek memnûn in û wiha got: “Tenê kesên ji partiyên kurd hatine hilbijartin xizmet ji vî bajarî re kirin. Mirov nikare hevşaredarên nû yê şaredarê serdema din bide ba hev. Em naxwazin navê Savci Sayan bibihîzin jî. Dema navê wî dibihîzim tansiyona min radibe. Ev bajar xwar. Yên xizmetê ji Agiriyê re dikin diyar in.” 

 

‘DAXWAZA GAZA XWEZAYÎ Û TAPOYÊ’ 

 

Cevdet Aydin jî li Taxa Cezaeviyê rûdine û got ku ji xizmetên şaredariyê razî ne. Aydin, wiha got: “Lê belê em dixwazin gaza xwezayî bînin taxa me. Li taxa me nêzî 500 mal hene û pirsgirêka tapûyê heye. Em dixwazin ev pirsgirêka me bê çareserkirin. Têkiliyên şaredariya me yên bi gel re li gorî şaredariyên din baştir e.” 

 

‘ELEQEDERBÛNA BI HER KESÎ RE JÎ XIZMET E’ 

 

Çavuş Daghan jî anî ziman ku ew ji xizmetên şaredariyê memnûn in û wiha domand: “Dê pirtûkxane, navenda çandê yan jî qursên ji bo zimanê dayikê yên ji bo zarokan jî pir baş bibin. Mehmet Akkuş cîranê min e û kesekî gelek baş e. Hazal Aras jî berê Hevşaredara Giyadînê bû. Gel pir jê razî bû. Dema zarokekî dibîne pê re diaxive, bi ciwanan, bi pîran re diaxive. Bi wan re eleqeder dibe. Anku li her kesî guhdar dike û ev jî xizmeteke. Şaredarên berê piştî hilbijartinê li te jî nedipirsiya. Deynên şaredarê zêde ne. Divê gel fatûreyên avê bide û ji şaredariyê re bibe alîkar. Bûdçeya şaredariya me tune ye. Lewma divê Banga Navendî alîkariyê bide. Di mijara paqijiyê de gelek baş in. Min dengê xwe neda DEM Partiyê lê min texmîn nedikir dê ewqas baş bixebitin. Divê derfetên kar bên peydakirin. Divê îktîdar bi awayekî wekhev piştgiriyê bide şaredariyan. Xizmetê çawa ji Dutaxê re bişînin divê wisa ji Agiriyê re jî bişînin.” 

 

‘EM JI XIZMETÊN ŞAREDARIYÊ MEMNÛN IN’ 

 

Nûsret Akboga, jî wiha got: “Em ji xizmetên şaredariyê memnûn in. Şaredariya berê tu derfet ji bo gel bi kar ne anî û sozên xwe bi cih ne anî. Şaredariya niha ji bo gel dixebite û sozên xwe pêk tîne. Savci Sayan soza vekirina febrîqeya tekstîlê dabû lê wisa nekir. Heke bihata vekirin dê ciwanên me neçûna bajarên din. Em ji xebatên şaredariya niha memnûn in. Şaredariyeke çalak e û ya herî zêde dixebite ye.” 

 

‘DIVÊ QURSÊN ZIMAN BÊN VEKIRIN’

 

Alî Haydar Ozmen, diyar kir ku şaredarî heta niha jî baş dixebite û wiha axivî: “Şaredariya berê gelek nebaş bû. Ev şaredariye xizmetê dike. Me şaredariya din weke rêveberiya qeyûm di dît. Ma dê qeyûm ji bo gel xizmetê bike? Her wiha em dixwazin ji bo zarokan qurs û qreşên zimanê Kurdî bên vekirin.” 

 

MA / Mehmet Guleş