MÊRSÎN - Endamên Meclisa Dayikên Aştiyê ya Mêrsînê ku li dijî hewldana tayînkirina qeyûm li pêşiya Şaredariya Akdenîzê li ber xwe didin, gotin ku wan kolan bi kolan xebatên hilbijartinê meşandine û ew ê xwedî li keda xwe derkevin. 

 

Hevşaredarên Akdenîz a Mêrsînê Hoşyar Sariyildiz û Nûriye Arslan û endamên Meclisa Şaredariyê Ozgur Çaglar, Neslîhan Oruç, Yakup Daniş û Hîkmet Bakirhan ên DEM Partiyî hatibûn binçavkirin. Bertekên li dijî binçavkirinan didomin. Çalakiya nobetê ya li dijî hewldana tayînkirina qeyûm hatiye destpêkirin di roja 3’yan de didome. Yên ku pêşengtiya çalakiyê dikin jî endamên Meclisa Dayikên Aştiyê ne ku di salên 90’î de ji neçarî koçberî Mêrsînê bûne. Dayikên ku bi stran û dirûşmên xwe coşê didin girseyê, diyar kirin ku bi polîtîkaya tayînkirina qeyûman pirsgirêka Kurd nayê çareserkirin. 

 

'EM Ê XWEDÎ LI VÎNA XWE DERKEVIN’ 

 

Ji Dayikên Aştiyê Halîme Kalkan (53) xwest hevşaredar tavilê bên berdan û wiha got: “Di demekî bi birêz Abdullah Ocalan re hevdîtinan dikin de tayînkirina qeyûman çiqasî rast e? Heke aştiyek çêbibe, divê êrişên ser Rojava bisekinin û dev ji tayînkirina qeyûman berdin. Hem aştî hem jî êriş bi hev re nabin. Dema sivîl tên qetilkirin aştî nabe. Qeyûm û êriş girêdayî hev in. Em ê heta dawiyê xwedî li vîna xwe derkevin. Me şaredariyên xwe bi saya xweha eniya xwe standin. Em ê xwedî li keda xwe derkevin.” 

 

'BILA MIROV NEMIRIN’

 

Dayika Aştiyê Kadriye Oguz (65) jî wiha got: “Ev zîhniyeta qirêjî dê têk biçe. Me şaredarî bi keda xwe bi dest xist. Tişta ev dewlet bi serê me tîne li dinyayê kesek bi serê tu gelan nayîne. Li rexekî qala aştiyê dikin li rea din dixwazin qeyûm tayîn bikin. Mixabin aştiyê naxwazin. Rêberê Gelê Kurd birêz Abdullah Ocalan aştiyê dixwaze. Dewlet li ser zilmê hatiye avakirin. Êdî bes e. Hûn çi ji gelê Kurd dixwazin? Em qeyûman naxwazin. Bila mirovên me nemirin.” 

 

'EM BI RÊBERÊ XWE RE NE’ 

 

Şemse Acar a 67 salî jî tevî temenê xwe yê mezin û pirsgirêkên tenduristiyê jî tev li çalakiyê bûye û wiha dibêje: “Em qeyûm naxwazin. Her kesên xwedî wijdan divê li dijî hewldana qeyûm derkevin. Bila bên vê derê. Hatina vê derê peywira me ye. Me kedekî mezin da û kolan bi kolan geriyan û me şaredarî bi dest xist. Em ê heta dawiyê xwedî li vîna xwe derkevin.” 

 

‘BI VAN POLÎTÎKAYAN AŞTÎ NABE’

 

Gule Barkirhan a 50 salî ku di Komkujiya 10’ê Cotmehê ya Gara Enqereyê de ji lingê xwe seqet bûye jî ev tişt anî ziman: “Me piştî kedeke mezin şaredarî bi dest xist lê ew dixwazin ji xwe re bikin qada rantê. Bi darê zorê vîna me desteser dikin. Em Kurd in lewma wiha dikin. Em ê heta dawiyê xwedî li vîna xwe derkevin. Bi van polîtîkayan aştî nabe. Qala aştiyê dikin lê şaredariyên me desteser dikin. Em ji bo aştiyê çûn Enqereyê lê bombe teqandin, niha bi birêz Ocalan re hevdîtinê dikin lê hewl didin qeyûm tayîn bikin.” 

 

Zubeyde Taniş a 65 salî ku bi stranên xwe coş dide girseyê jî got: “Hevdîtinek heye lê qeyûm jî heye. Bi tayînkirina qeyûman re aştî nayê. Ev planeke. Heke aştî bê divê qeyûm nebin.” 

 

Saniye Akbay a 53 salî jî wiha bertek nîşan da: “Têkoşîna me têkoşîna heqîqetê ye. Li her derê şaredar 5 salan dimînin lê yên me çendek mehan dikin. Em vê qebûl nakin.”