NAVENDA NÛÇEYAN - Prof. Dr. Franco Cavalli, diyar kir ku heta garantî neyên dayin, tu wateya banga berdana çekan a ji bo PKK’ê tê kirin nîne û got: “Abdullah Ocalan, aktorê sereke yê çareseriya pirsgirêka Kurd e.” 

 

Rêberê PKK’ê Abdullah Ocalan ku li Girtîgeha Tîpa F a bi Ewlekariya Bilind a Îmraliyê tê ragirtin, di 28’ê Kanûnê de bi Şandeya Îmraliyê ya DEM Partiyê re hevdîtin kir. Abdullah Ocalan, di peyama xwe de got ku ji bo çareseriyê amade ye. 

 

Zanyar, parastvanê mafên mirovan û siyasetmedarê Swîsreyî Prof. Dr. Franco Cavalli ku bi xebatên xwe li seranserî cîhanê tê naskirin, têkildarî nîqaşên ser çareseriya pirsgirêka Kurd, ji ANF’ê re axivî. 

 

‘ABDULLAH OCALAN AKTORÊ BINGEHÎN E’ 

 

Prof. Dr. Franco Cavalli anî ziman ku girîng e nîqaşên li ser çareseriya siyasî ya pirsgirêka Kurd ji nû ve destpê kirine û destnîşan kir ku helwesta dewleta Tirk a heta niha dûrî çareseriyê ye. Cavalli, diyar kir ku Abdullah Ocalan di çareseriya pirsgirêka Kurd de aktorekî bingehîn e û wiha got: “Azadiya Abdullah Ocalan ji bo çareseriya pirsgirêka Kurd xwedî girîngiyeke esasî ye. Mirov vê rolê dikarin bişinînin rola Nelson Mandela ya li Efrîkaya Başûr. Berdana Nelson Mandela bû hêmanê esasî ku dawî li dîktatoriya li dijî Efrîkayiyên li Efrîkaya Başûr yanî dawî li rejîma apartheidê bê anîn. Eger Mandela nehatibûya berdan, dibe ku negihîştîbûya wê nuqteyê. Di heman demê de ji bo destpêkirina çareseriya meseleya mafên gelê Kurd jî şertê bingehîn berdana Ocalan e."

 

'LI ALIYEKÎ ŞER, LI ALIYÊ DIN ÇARESERÎ NABE'

 

Prof. Cavalli, anî ziman ku ji ber helwesta dewleta Tirk ew nîqaşên li ser çareseriyê fêhm nake û wiha domand: “Gelekî zehmet e ku mirov nîqaşan fêhm bikin. Dewleta Tirk ji aliyekî ve li dijî Rojava ji her demê bêhtir helwesteke tund nîşan dide û derfetê nade ku Ocalan bi rengekî azad tevbigere û biaxive. Li aliyê din jî nîqaşên bi vî rengî yên gelekî biçûk li ser çareseriyê têne kirin. Dema ku mirov vê helwesta dewleta Tirk bînin ber çavên xwe, difikirin ku bûyerên diqewimin mîna şanoyekê ye. Bi dîtina min bûyerên ku diqewimin xwepêşandaneke dewleta Tirk e ku dixwaze piştgiriya li cîhana Rojava ya ji bo têkoşîna gelê Kurd û demokrasiya li Rojava lawaz bike. Bi rêya vê şanoyê dixwazin vê peyamê bidin; 'Binihêrin em di nava xwe de nîqaş dikin, em ewqasî jî nebaş nînin.' Ev şîroveya min e û baş pê nizanim bê rast e yan na, ji ber ku li ber destê me gelek agahiyên kêm hene. Nêrîna min ew e ku ev rewş lîstikek ji bo lawazkirina berxwedana Kurdan û piştgiriya raya giştî ya pêşverû ya li cîhana Rojava ya ji bo têkoşîna gelê Kurd e."

 

'HETA GARANTÎ NEBE TU WATEYA GOTINA DESTBERDANA JI ÇEKAN NÎNE'

 

Prof. Cavalli, banga dewleta Tirk a destberdana ji çekan nirxand ku vê bangê li PKK'ê dike û destnîşan kir ku mînakên cîhanê ji PKK'ê re dibêje “dest ji çekan bernede.” Cavalli, bi lêv kir ku bêyî dayina garantiyekê banga destberdana ji çekan a li PKK'ê tu wateyeke xwe nîne û ev nirxandin kir: “Sermeselê eger min îro karîbûya li ser navê şervanên Kurd biryarek bida, min ê bigota tu garantiya serketina vê pêvajoyê nîne û di rewşeke bi vî rengî de nîqaşên li ser destberdana ji çekan bêwate ye. Ji ber ku tu garantiyeke ku dewletê daye nîne. Di rewşeke bi vî rengî de ku tu garantî nîne, bi dîtina min divê dest ji çekan neyê berdan. Eger îro Erdogan nikare li ser Rojava bi temamî serwer be, sedema vê eykê berxwedana şervanên Kurdan e. Heke ne ji têkoşîna çekdarî ya şervanên Kurd bûya Rojava ji zûdeyî tune bûbû.

 

Destberdana ji çekan û afirandina aştiyê gelekî baş e, lê belê divê mirov zanibin ku ev yek ne şanoyeke biçûk e û dawiya dawî nabe sedema felaketekê. Ji ber ku eger carekê dest ji çekan hate berdan û yên ku soz dane sozên xwe bi cih nîne, wê her tişt biqede.

 

MÎNAKÊN CÎHANÊ JI PKK'Ê RE DIBÊJE DEST JI ÇEKAN BERNEDE

 

Gelek mînak li cîhanê hene ku di berdêla destberdana ji çekan soza demokrasiyê ji şervanên têkoşîna rizgariya neteweyî re hatine dayin. Mînak, weke ku li Amerîkaya Navîn û herêmên din ên cîhanê qewimî; her wiha di dawiya Şerê Cîhanê yê Duyemîn de hemû şervanên ku li dijî faşîzma Nazî şer kiribûn, difikirîn ku wê li gorî krîterên edaleta civakê guhertin bêne kirin. Lê belê piştî salekê Amerîkî bi Şerê Sar hatin û gotin, 'Em ji ber karê we spasiya we dikin, lê êdî qediya, em êdî bi rê ve dibin'.

 

Yanî çavdêriya min ew e ku niha ji bo Rojava, ji bo Kurdan, ji bo her kesên baweriya xwe bi demokrasiyê heye, garantiyeke cidî nîne ku ev pêvajo wê bi rengekî erênî be. Dema ku ev hemû li ber çavan bêne girtin, ger yê ku biryarê bide ez bûma, min ê bigota, na, em neçar in çekên xwe biparêzin.”

 

'ÇARESERÎ BI AZADIYA ABDULLAH OCALAN DIBE’

 

Prof. Franco Cavalli destnîşan kir ku destberdana ji çekan piştî çareseriyeke demokratîk a rasteqîn dikare pêk were û axaftina xwe wiha qedand: “Dema ku mirov mînaka Mandela bîne ber çavên xwe, rewşa destberdana ji çekan piştî azadiya Birêz Ocalan, piştî nîqaşên cidî yên li ser rêbaza çareseriya meseleya Kurd a bi gel û tevgerê re dikare pêk were. Lê belê ragirtina Birêz Ocalan di nava şert û mercên ne mirovî yên girtîgehê de û piştre jî bi rengekî nediyar lîstina şanoyê û gotina 'na, na em ê çareseriyê pêk bînin, çekên xwe bidin û em ê vê hal bikin', bi dîtina min ne tiştekî welê ye ku mirov cidî bibîne. Divê mirov nekevin vê xefikê.”