ÎZMÎR - Nûçegihanê wêneyan Mûrat Kocabaş ku li Îzmîrê dema çalakiyên protetsoyê dişopand hat derbkirin û binçavkirin, got: "Ji ber ku me tundiyê nîşan da em hatin binçavkirin."
Çalakiyên ku bi operasyona di 19’ê Adarê de li dijî Şaredariya Bajarê Mezin a Stenbolê û binçavkirina şaredaran dest pê kir û piştî binçavkirinan berdewam kir, bi rojan li seranserê welêt berdewam kir. Li gelek bajaran bi taybetî Stenbol, Enqere û Îzmîrê nêzî 2 hezar kes hatin binçavkirin û ji wan 300 kes hatin girtin.
Rojnamegerên ku di çalakiyan de karê xwe dikirin jî, polîsan tahde li wan kir. Li Stenbolê 7 rojnameger hatin binçavkirin û piştî 2 rojan hatin girtin. Li Îzmîrê rojnameger Yagiz Barut, Bariş Înce û nûçegihanê wêneyan Murat Kocabaş bi îdiaya "Muxalefeta li dijî qanûna civîn û xwepêşandanan bin pê kirine" hatin binçavkirin. 3 rojnamegerên ku di 24’ê Adarê de li Îzmîrê hatibûn binçavkirin, di 27’ê Adarê de hatin berdan.
Kocabaş der barê zextên li ser rojnamegeran de axivî.
‘DAYÎNA RASTIYÊ PEYWIRA ME YE'
Kocabaş diyar kir ku ev nerazîbûn nîşana hêrsa ji ber gelek pirsgirêkên li welêt in û got ku şopandina kiryarên piştî binçavkirina Îmamoglû dest pê kirin berpirsyar e. Kocabaş destnîşan kir ku rojnameger nû bi tundiyê re rû bi rû namînin û got: "Dema em karê xwe dikin, bi gelemperî di navbera çalakger û polîsan de tên girtin. Em bê fikar li qadan in. Ji ber ku ev karê me ye. Em karê gel dikin û bi berpirsyariya vê yekê em li qadan in. Ji roja ku çalakî dest pê kirine heta roja 23'yan min çalkaî şopandin û wêne girtin. Li gel vê min tundiya polîsan jî kişand. Min hewl da tundiya polîsan a li Bayrakli û Alsancakê bikişînim."
Kocabaş destnîşan kir ku binçavkirin ew matmayî nehiştiye û got: "Em û mpolîsan tim pev diçûn. Nedihiştin em tahdeya ku li ew li mirovan dikin bikişînin. Gava min çalakî dişopandin polîsan li min xist. Gava ji ber gazê bêhna min çikiya bi pehînan li min xistin. 2-3 rojan dikuliyam. Paşê bi qanûna '2991'ê ez binçav kirim. Desthilat bi krîmînalîzekirinê dixwaze rojnamegerên xwe biafirîne. Sansur jî ji ber vê tê kirin. Berê rojnamevan û mirovên xwe digihandin raya giştî dikuştin. Niha jî nêzî mirinê tahdeyê li wan dikin. Binçavkirina me bi zanebûnî ye. Ji lew re herî zêde em tahdeya li wir dibînin. Ên rastiya li wir bi raya giştî re parve dikin em in. Çapemeniya cîhanê vê tundiyê dît, lê desthilatê nexwest vê yekê bibîne."
Kocabaş di dawiya axaftina xwe de bilêv kir ku divê li ber êriş û tundiyê serî netewînin û bi hev re tevbigerin.