Parlementera HDP'ê Fîlîz Kerestecîoglû ku di nav bernameya "Ji Xizaniya Jinê Re Na" ya Meclîsa Jinan a HDP'ê de cih digire, destnîşan kir ku sedema herî girîng a xizaniya jinê newekheviya zayenda civakî ye û got: "Heya xizaniya jinê neqede, dê têkoşîn jî neqede."
Ayşe Tuba Aslan 23 caran serî li rayedarên dewletê dabû û alîkariya parastinê xwestibû. Lê ji ber rayedaran Aslan neparast, Yalçin Ozalpay ew kuştibû. 1'emîn danişîna doza Arslan li Edliyeya Herêmê ya Enqereyê hat dîtin. Dozgerê Dadgeha Îstînafê di danişina dozê de xwest cezayê kujerê Aslan, Yalçin Ozalpay bê daxistin.
Li Sêwazê derket holê ku Fatma Oz a 40 roj in winda ye ji aliyê Bahrî M. ve hatiye kuştin. Li Kirikkaleyê jî du dayik û keça xwe ji tundiya zilam birîndar bûn.
Dayika Xezal Kilinç a ku 10 sal in kurê xwe yê girtî nedîtiye diyar kir ku bi wê hesretê xwîn çûye ser mêjiyê wê û felc dimîne û got: "Beriya ez bimirim dixwazim azadiya kurê xwe bibînim."
B.G. ku li Kadikoyê di aşxaneyekê de dixebitî û piştî taciz û mobbîngê ji kar hat derxistin, anî ziman ku piştevaniya rêxistinên jinan ew bi hêz kiriye.
Aktîvîsta TJA’yê Umran Batûray ji doza bi îdiaya “endamtiya rêxistinê” û “propagandaya rêxistinê” hat beraetkirin.
Aktîvîsta TJA’yê Eylem Sarûcû, anî ziman ku kesên xwe weke endamên îstîxbaratê dane naskirin, gef lê xwarine û sîxûrtî lê ferz kirine.
Dê li Îzmîrê bi pêşengiya hin xwendekarên zanîngehê ên jin, atolyeya xweparastinê bê lidarxistin. Îzel Graca, destnîşan kir ku xweparastin bi qasî nan û avê girîng e.
Li ser têkoşîna jinan, biryara 400 zilamên li Bazara Semtê ya Jiyanê bên bi cih bibin, hat betalkirin.
Hevjînê wê yê berê Denîz Açikgoz gefa kuştinê li Naciye Kûrban xwar. Rexmî ku Kûrban 8 caran giliya Açikgoz kiriye jî derbarê Açikgoz de tu kirarî nehatiye kirin. Ji ber vê yekê Kûrban dengê xwe li ser medya sanal ragihand.
Dikandarên jin, diyar kirin ku di pandemiyê de alîkariya aborî ya ji bo dikandaran kêm e û gotin: “Dikandar li ber têkçûnê ne. Bêyî ku cudakarî bê kirin, divê alîkarî ji bo hemû dikandaran bê kirin.”
Hatûn Koç ku bi awayekî sîstematîk tahde lê hatiye kirin û ji bo vê 33 caran gilî kiribû, dîsa jî bi çekê hatibû birîndarkirin. Koç got: "8 sal in li korîdorên edliyeyê li edaletê digerim. Lê min nedît. Divê cezayekî giran li Ozkan Yarbî bê birîn."
Îkbal Eren, keça Dayika Şemiyê Elmas Erena ku bêyî ku hestiyên kurê xwe bibîne jiyana xwe ji dest da, got: "Dêya min her cara dihat binçavkirin berê xwe dida girseyê û digot, 'bêhêvî nebin.'"
Adnan Orhan ku 27 sal in li aqûbeta bavê xwe û du xizmên xwe dipirse, diyar kir ku Sedat Peker li xwe mikur hatiye, lê dîsa jî darizandin dest pê nekirine. Orhan, destnîşan kir ku dewlet naxwaze meseleya cinayetên kiryar nediyar zelal bike.
Berdevka Meclisa Jinan a HDP'ê Ayşe Acar Başaran, encamên hevdîtinên "Ji xizaniya jinan re na" ku parve kir, diyar kir ku li navçeya Kuluyê li 13 konan 150 kes bi hev re dimînin û wê destûrê nedin xizaniya jinan.