Dayikên Şemiyê di hefteya 852’yemîn de li aqûbeta windayan û faîlên wan pirsîn. Dayikên Şemiyê ji ber şewba koronayê bi rêya online çalakiya xwe li dar dixin. Vê hefteyê li faîlên Hasan Gulunay ê di 20’ê tîrmeha 1992’yan de li Stenbolê hat binçavkirin û windakirin pirsîn. 

 

‘EM Ê DEV JÊ BERNEDIN’ 

 

Keça Gulunay, Denîz Gulunay axivî û da zanîn ku bavê wê ji ber fikrên xwe yên şoreşger dewletê wî kiribû hedef û 29 sal in serî li hemû saziyên dewletê dane lê di her serlêdanê de dewletê ji wan re gotiye ‘Hasan Gulunay nehatiye binçavkirin.’ Gulunay got tevî biryara Dadgeha Destûra Bingehîn ku gotiye lêpirsînek bi bandor nehatiye birêvebirin jî lê bi ‘demboriyê’ re ser dosyeyê girtine. Gulunay destnîşan kir ku tevî hemû astengî û qedexeyan jî wê dest ji doza rastiya Tirkiyê ya windayan bernedin û heta faîl werin darizandin dê têkoşîna xwe bidomînin. 

 

‘DEMBORÎ NABE’ 

 

Parêzer Hulya Dinçer jî derbarê dosyeya lêpirsînê de agahî da û tevî Dadgeha Destûrî biryara binpêkirinê daye jî dosye ji ber demborînê nehatiye vekirin. Dînçer got di revandinê bi darê zorê de nabe ku demborîn bibe. 

 

‘EDALET JI BO WE NÎNE’ 

 

Xizma windayan Ayşe Gulen Eyî metna daxuyaniyê ya vê hefteyê xwend û destnîşan kir ku tevî malbatê serî li dozgeriyê û miduriyeta polîsan daye jî lê ji wan re hatiye gotin ku Hasan Gulunay ne di binçavan de ye. Eyî da zanîn ku dewletê di şexsê malbata Gulunay de ji Dayikên Şemiyê re gotiye ‘ji bo we edalet nîne.’