Xebatên hilbijartinên 14'ê Gulanê yên Partiya Çepên Kesk ên li bajarên Kurdistan û Tirkiyeyê bênavber didomin. Di xebatên hilbijartinê de hat gotin ku dê dawî li îktîdara AKP-MHP'ê bînin û pergalê bi hev re biguherînin.
Cîgirê Serokê Giştî yê CHP’ê Mûharrem Erkek têkildarî ewlehiya hilbijartinê wiha got: “Wezareta Karên Hundir, pergaleke şopandina hilbijartinê ya paralelî YSK’ê ava kiriye.”
Tifaqa Azadî û Demokrasiyê ya Kurd têkildarî namzetê serokkomariyê helwesta xwe zelal kir û destnîşan kir ku dê ji bo çareserkirina pirsgirêka kurd, guhertin û aramiyê dê di hilbijartinê de piştgiriya Kemal Kiliçdaroglû bikin.
Namzetên parlamenteriyê yên Partiya Çepên Kesk li gelek bajaran xebatên hilbijartinê meşandin. Namzeta parlamenteriyê ya Antalyayê Canan Çalagan got ku dê 14 rojan bênavber bixebitin û li rojeke azad hişyar bibin.
HDP’ê diyar kir ku desthilatdariya AKP-MHP’ê bi nêzbûna hilbijartinê re operasyonên siyasî zêde kir û got: “Li dijî vê derbeyê partiya me, pêkhateyên me û hêzên têkoşer ên li Tirkiyeyê, wê heta dawiyê li ber xwe bidin.”
Cîgirê Serokê Federasyona Mêrdîniyan a Îzmîrê Fûta Mîkaîloglû diyar kir ku hilbijartinên 14’ê Gulanê ji bo mêrdîniyan dîrokî ye û ew ê piştevaniya Partiya Çepên Kesk bikin û rayên wê du qat zêde bikin.
Namzetê suryan ê Partiya Çepên Kesk Edîp Arslan bal kişand ser rengîniya partiya xwe û wiha got: “Divê hemû gelên me di bin sîwana Partiya Çepên Kesk de bibin yek. Em dikarin bi cudahiyên xwe jiyaneke nû ava bikin.”
Nûnerên Partiya Çepên Kesk û HDP'ê diyar kirin ku li Mûglayê potansiyela zêdekirina dengan heye û wiha gotin: "Em li kuçeyê dibînin, em ê ji vir parlamenterekî bişînin meclisê."
Hevseroka Giştî ya HDP’ê Pervîn Bûldan a li navçeya Bodrûmê tev li civîna gel bû, diyar kir ku bayê Partiya Çepên Kesk ji rojhilatê Tirkiyeyê ve jî tê û wiha got: “Em dixwazin di 15’ê Gulanê de ji sibeyeke bêhiqûqî nebin re şiyar bin.”
Hevseroka Giştî ya HDP’ê Pervîn Bûldan diyar kir ku Partiya Çepên Kesk wê dengê xwe bide Kiliçdaroglû û got: “Gelan biryara xwe daye, wê biguherînin.”
Hevberdevkê Partiya Çepên Kesk Îbrahîm Akin ku di çalakiya Platforma Elewiyan a Îzmîrê de axivî, got: "Gelên me bibiryar in ku rejîma qesrê bişînin û doza guherînê dikin. Navnîşana vê guherînê jî Partiya Çepên Kesk e."
Hevberdevka Partiya Çepên Kesk a Amedê Pinar Sakik Tekîn di kongreya navçeyê ya partiyê de axivî û wiha got: “Me bi hezaran dest pê kir û niha bûne bi milyonan kes ku qad têrî me nakin.”
Hevberdevka Partiya Çepên Kesk Çîgdem Kiliçgun Uçar diyar kir ku wan her qada ku îktîdara AKP-MHP’ê êriş biriye ser veguherandine qadên berxwedan û wiha got: “Hilbijartinên 14’ê Gulanê dê bibin muhasebeya sedsalê. Êdî avakirina komara demokratîk neçarî ye.”
Alîgirên Partiya Çepên Kesk ên li Balikesîrê xebatên xwe bênavber didomînin diyar kirin ku wê parlamenterekî bişînin Enqereyê û wiha gotin: “Li Balikesîrê xwedî derketineke zêde heye. Ev jî kelecaneke mezin di nava me de diafirîne.”
Namzeta parlamenteriyê ya Partiya Çepên Kesk a Aydinê Ebrû Gunay diyar kir ku civak partiya wan weke navnîşana guherînê dibîne û wiha got: “Heta niha her tim Stenbol, Enqere yan jî bajarên Kurdistanê deverên girîng bûn. Lê fikriyata me li Egeyê teşe digire û dê roj bi roj xurtir bibe.”